काठमाडौं । टर्कीमा गएको भूकम्पका कारण कोही नेपाली नागरिक समस्यामा परेमा जानकारी गराउन नेपाली राजदूतावासले आग्रह गरेको छ । टर्की समेत हेर्ने पाकिस्तानको इस्लामाबादस्थित दूतावासले प्रभावित क्षेत्रका नेपाली नागरिकसँग दूतावास निरन्तर सम्पर्कमा रहेको जनाएको छ ।

• टर्की भूकम्पमा मृत्यु हुनेको संख्या चार हजार ३०० भन्दा बढी (३१ तस्बिर)

“टर्कीमा आज (सोमबार) गएका दुई शक्तिशाली भूकम्पहरू एवं परकम्पबाट प्रभावित त्यस क्षेत्रमा रहेका नेपाली नागरिकहरूसँग यस राजदूतावास निरन्तर सम्पर्कमा रहेको छ,” उक्त दूतावासद्वारा जारी अपिलमा उल्लेख छ, “उहाँहरूलाई परिवार र आफन्त एवं साथीहरूसँग सम्पर्कमा आउन र यस विषम परिस्थितिमा आफ्नो समस्याका बारेमा यथाशीघ्र जानकारी गराउन अनुरोध गरिएको छ ।”

हालसम्म पनि परिवार, आफन्त, साथीहरूसँग सम्पर्कमा नआएका एवं कुनै समस्यामा परेका नेपालीसम्बन्धी खबर प्राप्त भएमा जानकारी गराउन दूतावासले अपिल गरेको छ । त्यसका लागि सम्पर्क नम्बरहरू पनि उपलब्ध गराइएको छ ।

दूतावासका अनुसार नेपाली राजदूतावास, इस्लामाबादको फोन नम्बर–००९२ ५१२६१०३१७, ह्वाट्सएप नम्बर–००९२५१२६१०३२१ र इमेल भयलष्कबिmबलबम२mयाब.नयख.लउ मा सम्पर्क गर्न सकिनेछ ।

यस्तै, टर्कीमा रहेका विनोद पौडेललाई ९०५३७२७७७१९६ मा सम्पर्क गर्न सकिने दूतावासले जनाएको छ ।