काठमाडौं । पाँचौ स्थानका एन्ड्रे रुबलेभलाई ३–० को सोझो सेटमा पराजित गर्दै नोभाक जोकोभिच वर्षको पहिलो ग्रान्डस्लाम अस्ट्रेलियन ओपनको सेमिफाइनलमा प्रवेश गरेका छन् ।
अस्ट्रेलियाको मेलबर्नस्थित रोड लभेर एरिनामा भएको खेलमा चौथो स्थानका जोकोभिचले रुसका रुबलेभलाई ६–१, ६–२, ६–४ को स्कोरमा पराजित गरे ।
२१ पटकका ग्रान्डस्लाम च्याम्पियन जोकोभिचले गत वर्ष कोभिड–१९ विरुद्धको खोप नलगाएका कारण प्रतियोगिता खेल्ने अनुमति पाएका थिएनन् । ३५ वर्षीय जोकोभिचले हालसम्म नौ पटक अस्ट्रेलियन ओपनको उपाधि जितेका छन् ।
जोकोभिचले अब फाइनल प्रवेशका लागि अमेरिकाका टमी पाउलविरुद्ध खेल्नेछन् । वरीतयाको ३५औं स्थानका पाउलले आजै भएको क्वार्टरफाइनल खेलमा आफ्नै देशका बेन सेल्टोनलाई ३–१ को सेटमा पराजित गर्दै सेमिफाइनलमा स्थान पक्का गरेका थिए । पाउलले सेल्टोनविरुद्ध ७–६ (८–६), ६–३, ५–७, ६–४ को स्कोरमा जित निकालेका थिए ।
यससँगै प्रतियोगिताको सेमिफाइनल समीकरण पूरा भएको छ । यसअघि मंगलबार भएको खेलमा जित निकाल्दै ग्रीसका स्टेफानोस सित्सिपास र रुसका कारेन खाचानोभले सेमिफाइनलको टिकट काटेका थिए । दुवै सेमिफाइनल खेलहरु प्रतियोगिताको सेमिफाइनल खेल शुक्रबार हुनेछन् ।