काठमाडौं । अमेरिकाका टमी पाउल वर्षको पहिलो ग्रान्डस्लाम अस्ट्रेलियन ओपनको सेमिफाइनलमा प्रवेश गरेका छन् ।

२५ वर्षीय पाउलले पहिलोपटक अस्ट्रेलियन ओपनको सेमिफाइनलमा स्थान बनाएका हुन् । पाउलले सन् २०२० देखि अस्ट्रेलियन ओपन खेल्न सुरु गरेका थिए ।

अस्ट्रेलियाको मेलबर्नस्थित रोड लभेर एरिनामा सम्पन्न खेलमा वरीयताको ३५औं स्थानका पाउलले आफ्नै देशका बेन सेल्टोनलाई ३–१ को सेटमा पराजित गर्दै सेमिफाइनलमा स्थान पक्का गरे । वरीयताको ८९औं स्थानमा रहेका सेल्टोनलाई पाउलले ७–६ (८–६), ६–३, ५–७, ६–४ को स्कोरमा पराजित गरे । गत वर्ष पाउल प्रतियोगिताको दोस्रो चरणबाटै बाहिरिएका थिए ।

पाउलले सेमिफाइनलमा अब एन्ड्रे रुबलेभ र नोभाक जोकोभिचबीचको विजेतासँग खेल्नेछन् । यसअघि मंगलबार भएको खेलमा जित निकाल्दै स्टेफानोस सित्सिपास र करेन खातानोभले सेमिफाइनलको टिकट काटिसकेका छन् ।