इटहरी (सुनसरी) । इटहरी वडा नम्बर ४ को चौधरी टोल । कोही थपडी बजाउँदै थिए त कोही हात हल्लाउँदै थिए । अलिपर सिटी सफारीमा चुनावी गीत बज्दै थियो । गीतभन्दा कार्यकर्ताको होहल्ला बढी थियो । बीचमा छमछमी नाच्दै थिए, उमेदवार सीताराम मेहता ।
 
मेहता छमछमी नाच्दा कार्यकर्ताले थप उत्साह थपिरहेका थिए । मेहताले छेउमै थपडी बजाउँदै गरेका एक स्थानीय मतदातालाई पनि आफूसँगै ताने अनि सँगै नचाए । 

नेपाली कांग्रेस सुनसरी क्षेत्र नम्बर २ का प्रतिनिधिसभा सदस्य उमेदवार सीताराम मेहताको यो चुनावी प्रचार शैलीले अहिले सबैको ध्यान तानेको छ । उनी जहाँ जहाँ चुनाव प्रसार गर्न पुग्छन् । त्यहाँको माहोल तताउँछन् । गीत गाउँदै थपडी बजाएर कार्यकर्ता र मतदातासँगै यसरी नै छमछमी नाचिदिन्छन् । 

सीताराम उमेरले ६६ कटिसके । तर, जोश घटेको छैन । घरदैलोमा हिडँदा उनलाई भेट्न कार्यकर्तालाई हम्मेहम्मे पर्छ । उनको भोट माग्ने शैली पनि बैग्लै छ । घरदैलोमा हिँड्दा बाटोमा भेटे जति सबैसँग हात मिलाउँछन् । मतदाताको घरभित्रै पस्छन् । उमेर अनुसार साइनो लगाउँछन् । अलि उमेरले बुढापाका भेटे कसैका खुट्टा, कसैको हातमै ढोगिदिन्छन् । 

जस्तो मान्छेलाई भेटे उस्तै बनिदिन्छन् । युवा भेटे गला मिलाउँछन् । अनि भन्छन् ‘के छ यार ? यस पाली त भोट हाल्नुपर्छ नि !’ उनको यो चुनावी प्रचार शैली सबैलाई आश्चर्य पार्ने खालको छ । तर, उनलाई नजिकबाट चिन्नेहरू यो उनको पुरानै शैली भएको बताउँछन् ।
 
नेपाली कांग्रेस सुनसरी जिल्ला सभापति केदार भण्डारी मेहताको जोशिलो शैली पुरानै भएको बताउँछन् । अघिल्लो निर्वाचन पनि यस्तै शैलीबाट प्रचारमा हिँडेको सभापति भण्डारीले बताए । साधारण जीवन शैली र सबैसँग मिलानसार हुने उनको छुट्टै पहिचान भएको भण्डारी सुनाउँछन् । ०७४ को निर्वाचनमा, “गरिबका नेता सीताराम महेता” को नारा लगाउँदै मेहता मत माग्न हिँडेका थिए । यस पटक उनले यो नारा लगाएका छैनन् । तर, त्यो जोशिलो शैली भने छाडेका छैनन् । 

जोशिलो शैलीले मत माग्दै हिँडेका मेहता आफूसँग ठूलो एजेण्डा नभएको बताउँछन् । इटहरी वडा नम्बर १८ मा घरदैलो गर्दै भेटिएका मेहताले भने, “ मलाई जनताले धेरै ठूलो कुरा भनेको थिएनन् । सानोसानो कुराहरू भनेका थिए ।  कृषिमा उत्पादन वृद्धि गर्न सिचाई, आधुनिकीकरण, यान्त्रीकरण, स्वास्थ्य शिक्षा, सडक, बाटो बनाउन मागेका थिए ।”

अघिल्लो पाँच वर्षमा धेरै ठाउँमा मठमन्दिर, विद्यालयको भवन निर्माण गरेको उनी बताउँछन् । केही सडकको ठेक्का लागेको र केही बाँकी रहेको उनी बताउँछन् । ती पूरा गर्न मत माग्दै घरदैलोमा गइरहेको मेहताले बताए । उनका चुनावी ऐजेण्डा यही हो । 
 
शक्ति प्रर्दशन गर्दै आचार्य 
यसअघि दुई पटक चुनाव जितेका सीताराम तेस्रो पटक चुनाव लड्दै छन् । उनको ‘ह्याट्रिक’ गर्ने योजना छ । तर, यसपटक उनलाई त्यति सहज छैन । उनका प्रतिपर्धी हुन नेकपा(एमाले)का पूर्व केन्द्रीय सचिव नेता भीम आचार्य । उनी प्रदेश–१ का पूर्वमुख्यमन्त्री पनि हुन् ।
 
०७४को निर्वाचनमा सुनसरी क्षेत्र नम्बर–१ को १ बाट चुनाव लडेका आचार्य यस पटक क्षेत्र परिवर्तन गर्दै २ नम्बरमा पुगेका छन् । आचार्यले जित्नैका लागि क्षेत्र परिवर्तन गरेको एमालेकै नेताहरू बताउँछन् । आचार्य पनि खस्किएको आफ्नो छवि उकास्न जित निकाल्नै पर्ने दबाबमा चुनावी प्रचारप्रसारमा छन् ।
 
उनी पनि कार्यकर्ताको ठूलो दलबलसहित घरदैलो गरिरहेका छन् । आफ्नो एजेण्डा सुनाउँदै मत मागिरहेका छन् । आचार्यले प्रचारप्रसार गर्ने टिम मै आफ्नो शक्ति प्रर्दशन गरेको देखिन्छ । इटहरीको वडा नम्बर २० को तरहरा बजार हुँदै भवानीपुरतर्फ बढेको उनका घरदैलो टिम हेर्दा यस्तै देखिन्थ्यो ।
 
ठूलो संख्यामा कार्यकर्ताको सहभागिता, सिटी सफारीको लामो लाइन, मोटरसाइकल, अनि गाडीका लस्करले विजय र¥यालीको झल्को दिन्थ्यो । घरदैलोमा हिँडेका आचार्यले सडकका बीच चोक तथा गौँडामा उभिएर आफ्ना एजेण्डा सुनाउने गरेका छन् । पूर्वाधार विकासलाई आचार्यले आफ्नो प्रमुख एजेण्डा बनाएका छन् । प्रदेश र संघमा एमालेको सरकार बनाउन सके आधारभुत रुपले व्यवस्था र अवस्था परिवर्तन गर्ने आचार्यको भनाइ छ । 

देशको परितर्वनको चाहनालाई पूरा गर्न पूर्वाधार विकास नै पहिलो प्राथमिकता हुने उनले सुनाए । इटहरी वडा नम्बर २० को चुनावी प्रचार सभालाई सम्बोधन गर्दै आचार्यले भने, “सुनसरी जिल्लाको रुपान्तरणकारी परिवर्तनका लागि विशेष योजना, मार्गचित्रसहित पूर्वाधार विकास गर्नुपर्छ । सडक, शिक्षा, स्वास्थ्यका क्षेत्रमा हामी, हाम्रो टिमले काम गर्नेछौँ ।”
  
आचार्यले सामाजिक सुरक्षाको कुरा पनि उठाए । “तपाईंहरुले भत्ता त लिँदै हुनुहुन्छ नि । त्यो एमालेले दिएको हो । हामीले दिएको हो । अब हामी त्यसलाई अझ व्यवस्थित गर्छौं,” उनले भने ।

आचार्यले आफ्ना एजेण्डाभन्दा पनि सामाजिक सुरक्षाको कुरालाई बढी जोड दिएका छन् । वृद्धभत्तालाई एमालेले दिएको भन्दै त्यसको क्रेडिट लिन दोहोर्याएर सोही कुरा बताइरहेका छन् । वडा नम्बर २० मा मात्रै नभएर आचार्यले अन्य वडाका सभामा पनि सो कुरा बताउने गरेका छन् । 

सुनसरीमा एमालेले जनता समाजवादी पासर्टीसँग तालमेल गरेको छ । जसपाको मत पाउने आशामा आफ्नो विजय हुने आचार्यको विश्वास छ । आफ्नो गृहक्षेत्र साथै राजनीतिक क्षेत्र भएकाले जनताले मत दिने आचार्यको विश्वास छ ।