जनकपुरधाम । मधुमाला यादव आसन्न निर्वाचनमा सर्लाही निर्वाचन क्षेत्र नम्बर ४ बाट प्रतिनिधिसभा सदस्य पदको उमेदवार छिन् । २६ वर्षीय मधुमालाले महिला नेतृत्वको आवश्यकता औल्याउँदै स्वतन्त्र उमेदवारी दिएकी छन् । उनी अहिले क्षेत्रमा मत माग्न व्यस्त छिन् । 

दुई गठबन्धनका सहित १९ जना पुरुष उमेदवारसँग प्रतिस्पर्धामा उत्रेकी उनी आफूलाई बलियो उमेदवारको रुपमा दाबी गरिरहेकी छन् । उनी विजयी हुनेमा विश्वस्त पनि देखिन्छिन् । तर, प्रभावशाली नेताहरु प्रतिस्पर्धामा रहेकाले यस क्षेत्रमा हारजित आकलन गर्न कठिन छ । 

सर्लाही ४ मा नेपाली कांग्रेसले टिकेट नदिएपछि निर्वतमान सांसद अमरेश सिंहले स्वतन्त्र उमेदवारी दिएका छन् । सत्ता गठबन्धनबाट कांग्रेसका नागेन्द्र राय तथा प्रतिपक्षी नेकपा (एमाले)–जसपा गठबन्धनबाट जसपाका राकेश मिश्र उमेदवार छन् । दलहरुबाट कूल ९ जना र स्वतन्त्र ११ जना गरी २० जना उमेदवार चुनावी मैदानमा भए पनि महिला मधुमाला मात्रै हुन् ।

विगतमा पुरुष नेता धेरैपटक जितेर गए पनि यहाँ खासै परिर्वतन नभएपछि सरकारी जागिर छोडेर राजनीतिमा आएको उनी बताउँछिन् । “कयौँपटक यहाँबाट नेताहरु जितेर गए पनि समस्या उस्तै छ,” उनले भनिन्, “महिला, गरिब, विपन्न र विकासको क्षेत्रमा कामै भएको छैन । शिक्षा र स्वस्थ्य त झन बिग्रेको छ ।”

यस क्षेत्रको समग्र विकासको लागि महिला र युवा नेतृत्व आवश्यक रहेको हुनाले उमेदवारी दिएको उनले बताइन् । तर, उमेदवारी मधुमालाको भए पनि राजनीति भने उनको बुबा शिवपुजन रायले गरेको कतिपयको बुझाइ छ । उनको प्रचारप्रसार सामग्रीमा पनि शिवपुजनको फोटो र नाम राखिएको छ । बुबाकै नाममा मधुमालाले मत माग्ने गरेकी छन् ।

शिवपुजन नेकपा (माओवादी केन्द्र)का नेता हुन् । ०७४ को निर्वाचनमा माओवादीबाटै टिकट पाएका थिए उनले । तर, रातो पासपोर्ट दुरुपयोग प्रकरणमा मुछिएपछि सर्वोच्च अदालतले उनको उमेदवारी खारेज गरिदिएको थियो । 

०६४ को संविधानसभा चुनावमा उनी तत्कालीन मधेशी जनअधिकार फोरमबाट निर्वाचित भएका थिए । उनको श्रीमती मीनादेवी यादव यसपटक पनि माओवादी केन्द्रबाट नै समानुपातिक उमेदवारको बन्दसूचीमा समावेश छ । गएको स्थानीय निर्वाचनमा पनि उनको २२ वर्षीया छोरा राजाबाबु यादव माओवादीबाट नै रामनगर गाउँपालिकाको अध्यक्षमा निर्वाचित भएका थिए ।
 
मधुमाला माओवादीको मत पनि आफूले पाउने आशमा छिन् । यस क्षेत्रमा ५० वटा वडा पर्दछन् । जसमध्ये ११ वटा वडा माओवादी केन्द्रले जितेको छ । यहाँ माओवादीले १८ हजार ६६५ मत ल्याएको छ । ६ पालिका पर्ने यस क्षेत्रका दुई पालिका प्रमुख र उपप्रमुख पनि माओवादीकै छन् ।

वडाको मत केलाउँदा गत स्थानीय चुनावमा कांग्रेसको २३ हजार १३१, लोसपाको १४ हजार ७३१, एमालेको ११ हजार ६७४, जसपाको ६ हजार ४३३, जनमत पार्टीको दुई हजार ६१२ र नेकपा (एकीकृत समाजवादी)को ६०९ मत आएको थियो ।