डडेलधुरा । कात्तिक १७ गते गृहजिल्ला आइपुगेका प्रधानमन्त्री तथा नेपाली कांग्रेसका सभापति शेरबहादुर देउवा आइतबार फर्किएका छन् । सुदूरपश्चिमको अस्थायी राजधानी धनगढीमा रहेको निजी निवासमा रहेका देउवा अहिले कार्यकर्ता भेटघाटमा व्यस्त छन् । चार दिने डडेलधुरा बसाइको क्रममा देउवाले सात पालिकाका सात चुनावी सभालाई सम्बोधन गरे । 

पहिलो दिन जिल्ला सदरमुकाम रहेको अमरगढी नगरपालिकास्थित बागबजारमा गठबन्धनले आयोजना गरेको चुनावी सभालाई सम्बोधन गरेका देउवाले दोस्रो दिन नवदुर्गा गाउँपालिका र गन्यापधुरा गाउँपालिकामा आयोजित चुनावी सभालाई सम्बोधन गरे । तेस्रो दिन अजयमेरु गाउँपालिका र भागेश्वर गाउँपालिका तथा चौथो दिन आलिताल गाउँपालिका र परशुराम नगरपालिकामा आयोजित आमसभालाई उनले सम्बोधन गरे ।
  
सात चुनावी सभालाई सम्बोधन गर्दै देउवाले पश्चिम सेती जलविद्युत् आयोजना र विमानस्थल निर्माण गर्ने, मेडिकल कलेज सञ्चाल गर्ने र ग्रामीण क्षेत्रका सडक स्तरीय बनाउने घोषणा गरे । देउवाले एमाले अध्यक्ष केपी शर्मा ओलीले संसद् विघटन गरेपछि बाध्य भएर आफू प्रधानमन्त्री भएको र गठबन्धनको आवश्यकता अझै १५–२० वर्ष रहेको भन्दै भोट पनि मागे । 

सातवटा चुनावी सभालाई सम्बोधन गर्ने क्रममा देउवाले आफ्नो प्रतिस्पर्धीबारे भने एक शब्द पनि बोलेनन् । मंसिर ४ को निर्वाचनका लागि एउटा मात्रै प्रतिनिधिसभा निर्वाचन क्षेत्र रहेको डडेलधुरामा देउवासँगै कांग्रेस बीपीका कर्णबहादुर मल्ल, राप्रपाका गोविन्द खडायत, जनता समाजवादीका श्याम सिनाल, स्वतन्त्र सागर ढकाल, विक्रमबहादुर शाही, कर्णसिंह रावल ‘मम्याल बाजे’ र लालबहादुर कठायत उमेदवार छन् ।

‘देउवाले अरूलाई प्रतिस्पर्धी नै ठान्नु भएको छैन’ 
सात चुनावी सभालाई सम्बोधन गर्ने क्रममा देउवाले आफ्ना प्रतिस्पर्धीबारे मुख खोलेनन् । देउवासँगै डडेलधुरामा आयोजित चुनावी सभामा सहभागी भएका कांग्रेस केन्द्रीय सदस्य नैनसिंह महर अहिले कांग्रेसको प्रतिस्पर्धी नै कोही नदेखेको बताउँछन् । “हुन त प्रतिनिधिसभा निर्वाचनमा देउवाविरुद्ध धेरैले उमेदवारी दिएका होलान्,” महरले भने, “तर अहिलेको ठूलो दल नेकपा एमालेले उमेदवारी फिर्ता गरेर प्रधानमन्त्रीज्यूलाई मौन समर्थन जस्तै गरेको छ । माओवादी केन्द्र र एकीकृत समाजवादीले पनि देउवालाई समर्थन गरेर भोट मागिरहेका छन् । अन्यलाई न उहाँ (देउवा)ले प्रतिस्पर्धी ठान्नुभएको छ । न त नेपाली कांग्रेसले नै ठानेको छ ।” 

केन्द्रीय सदस्य महरले अहिले डडेलधुराको निर्वाचन गोलकिपर बिनाको फुटबल खेल जस्तै भएको टिप्पणी गरे । “गोलकिपर नै छैन भने जाली च्यातिने सम्भावना बढी हुन्छ । डडेलधुराको निर्वाचन पनि नेपाली कांग्रेसका लागि प्रतिस्पर्धी बिनाको भइरहेको छ,” उनले भने । 

नेपाली कांग्रेस डडेलधुराका सचिव हेमराज चटौत प्रधानमन्त्री देउवाको स्वभाव नै त्यस्तै रहेको बताउँछन् । “अहिले मात्रै होइन, कुनै पनि निर्वाचनमा आफ्ना प्रतिस्पर्धीबारे प्रधानमन्त्रीज्यूले बोलेको मैले सुनेको छैन । उहाँको स्वभाव नै त्यस्तै हो,” चटौतले भने । 

कर्ण मल्ल भन्छन् : यसपटक देउवा हार्ने ग्रहदशा छ
देउवासँग रुष्ट भएर स्थानीय तह निर्वाचनमा आफ्ना कार्यकर्तालाई कांग्रेस बीपीमार्फत चुनाव लडाएपछि पार्टीबाट निष्कासित कर्णबहादुर मल्लसँग देउवाको प्रतिस्पर्धा हुने आंकलन गरिएको छ । यद्यपि, कांग्रेस डडेलधुराले भने आफ्नो प्रतिस्पर्धी कोही पनि नभएको बताउँदै आएको छ । मल्ल नेपाली कांग्रेस डडेलधुराका पूर्वसभापति हुन् भने प्रधानमन्त्री हुँदा देउवाको प्रमुख स्वकीय सचिवका रुपमा लामो समय काम गरेका थिए । आफ्ना राजनीतिक गुरु देउवाविरुद्ध चुनावी प्रतिस्पर्धामा उत्रिएका मल्ल अहिले आफ्नो एजेण्डा प्रस्तुत गरेरभन्दा पनि देउवाले ३१ वर्षदेखि डडेलधुरावासीलाई ठगेको भन्दै भोट मागिरहेका छन् । 

मल्लले यसपटक देउवालाई हराउने ग्रहदशा रहेको बताउँदै आएका छन् । “देउवाले आफूलाई जोतिषले सातपटक प्रधानमन्त्री हुने योग छ भनेको भन्नुहुन्छ,” मल्ल भन्छन्, “अब उहाँ के का लागि छैठौं, सातौँपटक प्रधानमन्त्री बन्नुहुन्छ ? मेरो ज्योतिषले पनि मलाई यसपटक तिम्रो ग्रहदशाले शेरबहादुर देउवालाई हराउने छ भनेको छ ।” 

देउवाले एकलौटी रूपमा सातौँ जिल्ला अधिवेशन तथा १४औँ महाधिवेशन गरेको भन्दै मल्ल लामो समयदेखि रूष्ट थिए । स्थानीय तहको चुनावमा उनले नेपाली कांग्रेस बीपीबाट चुनाव लड्ने भन्दै एमालेसँग गठबन्धन गरेपछि कांग्रेसको साधारण सदस्यसमेत नरहने गरी उनलाई कारबाही गरिएको थियो ।