पूर्वकानुन मन्त्री तथा निर्वतमान महान्यायधीवक्ता अग्नि खरेल निर्वाचन प्रचारप्रसारमा व्यस्त छन् । झापा क्षेत्र नम्बर–२ बाट उनी चुनाव लड्ने चाहना राखे पनि १ नम्बर क्षेत्रबाट चुनाव लड्दैछन् । 

कांग्रेस महामन्त्री विश्वप्रकाश शर्मा उनको प्रतिस्पर्धी हुन् । एमाले राप्रपासँग गठबन्धन गरेर चुनाव लड्दैछ । यता, कांग्रेस र माओवादी एक ठाउँमा छन् । 

बाह्रखरीले चुनाव केन्द्रित कुराकानी खरेलसँग गरेको छ । खरेलसँग बाह्रखरीकर्मी रोमन आचार्यले झापा क्षेत्रनम्बर १ पुगेर गरेको कुराकानीको सम्पादित अंश :

मतदाताको घरदैलो पुग्दा उनीहरूले दिने प्रतिकृया के छ ? 

जनताको आशा मरेको छैन, अपेक्षा पनि उत्तिकै धेरै छ । झापाको ५ निर्वाचन क्षेत्रमध्ये सबैभन्दा विकास नभएको निर्वाचन क्षेत्र यही हो । हरियाली छ, रमणीय वातावरण छ । तर, बाटोको अवस्था नाजुक छ । पूर्वाधार विकासको आवश्यकता छ । 

सडकको स्तरोन्नती यहाँको पहिलो आवश्यकता हो । खोल र नदी सातवटा छन् जहाँ तटबन्धन कार्यक्रम छैन । नदीले दुःख दिएको ठाउँमा यो कार्यक्रम किन आएन अचम्म छ । हात्ती आतंक यहाँको अर्को समस्या हो । 

फेन्सिग तार लगाएको र केही समस्या समाधान भएको जनताले भनेका छन् । तर, पूरै समस्याको समाधान भएको छैन । जनताको जीवन बचाउन लाग्नुपर्ने आवश्यक्ता महसुस भएको छ । स्थायी समाधान खोज्नुपर्ने छ । जनताको तटबन्धन कार्यक्रम लागु गर्न सके हात्ति नियन्त्रण हुने रहेछ ।

यसबाहेक सिचाईं, खानेपानीको समस्या छ । केही मानिसले आफैँ समस्या समाधान गरेका छन् । कृषिमा व्यवसायीकरण र शिक्षामा व्यवसायीक शिक्षालगायत विषय छन् । अरु निर्वाचन क्षेत्रमा विकास हुने तर हाम्रोमा निक नहुने भनेर जनताले प्रश्न उठाइरहेका छन् । 

यहाँबाट पटकपटक निर्वाचित हुने दल एमालेनै हो । समस्या समाधानमा एमाले किन चुक्यो ? 

०७४मा गठबन्धन गरिएको हो । सिद्धान्ततः गठबन्धन गलत थिएन । व्यक्तिको कारणले गठबन्धन असफल भयो । एमालेबाट जन्मिएर कांग्रेसबाट निस्किए । एमालेले चुनाव जिताया । 

तर, प्रचण्ड कांग्रेसको प्रधानमन्त्री बनाउन पुग्नुभयो । त्यती भएर पनि विकास निर्माणको कार्यमा जोडिएको भए माओवादी साथीहरूले आजको दिनमा शीर निहुराएर हिड्ने अवस्था आउने थिएन । 

यहाँ त माओवादी साथीहरूले शिर निहुराउने स्थितिमा पुर्याउनु भयो । पार्टी जहाँ रहे पनि सांसदले गर्ने काम भएन । त्यो भन्दा अगाडि कामहरू भएका छन् । पुल बनाउने, बाटो बनाउने काम भएको छ । 

जति पनि बाटो बनेको छ, सबै प्रदेश सांसद्हरूले पैसा हालेका हुन् । यहाँको संघीय प्रतिनिधि माला सुकेर गयो तर आउनु भएन भन्ने जनताको गुनासो छ । 

गठबन्धनमा हिजो एमाले पनि थियो । यसको जवाफ त दिनुपर्ला नि ? 

पर्दैन । किनभने म एमालेको नेता हुँ । यही भनेर जनतालाई बुझाइरहेको छु । यहाँभन्दा अघिका एमाले साथीहरूले पनि जनतलाई धोका दिने काम गर्नुभएको छैन । 

तर, पार्टी छोडेर जानेले धोका दिएका छन् । नभएका कामको जवाफ त गठबन्धनले दिनुपर्छ । डेढ वर्षदेखि उहाँहरुको सरकार छ । 

चुनाव जसले जितेको हो उसले जवाफ दिनुपर्छ । तर, सांसदले जनतासँग मिलेर काम नगरेसम्म सफल हुँदैन भन्ने शिक्षा हामीले लिनुपर्छ, जुन् मैले गहिरोसँग लिएको छु । 

मैले जनतालाई निर्वाचन जितेर गइसकेपछि चारपाँच महिनाको बीचमा आउँछु । दिक्क पार्नेगरी आउँछु भनेको छु ।
 
कानुनमन्त्री पनि भइसक्नुभयो, निर्वतमान महान्यायाधीवक्ता र एमाले स्थायी कमिटी सदस्य पनि हुनुहुन्छ । प्रतिस्पर्धी कांग्रेस महामन्त्री हुनुुहुन्छ, उहाँलाई हराउन ट्याकल के छन् ? 

यहाँ ठूलो प्रतिस्पर्धानै छैन । मिडियाले प्रतिस्पर्धा भनेर लेखेका छन्, जसको असर मान्छेलाई प्रतिस्पर्धानै हो कि भन्ने परेको छ । 

स्थानीय तहको निर्वाचन परिणामले हामीलाई माथि र पहिलो दल बनाएको छ । संघीय निर्वाचनमा यो अझ प्रभावकारी बनेर जान्छ । यसमा धेरै तलमाथि हुनेवाला छैन । राप्रपासँग यहाँ तालमेल छ । 

ऊसँग ६ हजारको हाराहारीमा मत छ । त्यो दुबै जोड्दा ११ हजारको मतान्तर देखिन्छ । दोस्रो जे सुकै भए पनि एमालेलाई जनताले विश्वास गर्न छाडेका छैनन् । 

अरु पार्टीमा जनताको विश्वास छैन । त्यसकारण ठूलो साथ र समर्थन एमालेमा रहेको र कार्यकर्ताहरुको परिचालन भएको अवस्था छ । म आफैँ पार्टीको आन्तरिक विवादमा परेको छैन । झापाको पार्टी इन्चार्ज हुँ । 

र, आन्तरिक विवादमा परेकै छैन । अलिअलि साथीहरूले कोट्याउन खोजेका थिए, कमजोर पार्नलाई । भ्वाङ्ग पार्न सकिन्छ कि भनेर तर मेरो सवल पक्षले कसैले केही गर्न सकेन ।
 

टुरिष्ट नेता अब चाहिँदैन पनि भने ? 

अब त्यो रहेन । म ०२४ सालमा गौरादहमा आएर बसेको÷हुर्केको मान्छे हो । मैले झापा टेक्दा मेरा प्रतिपक्षीले धर्तिनै टेकेका थिएनन् । ०३४ सालमा एसएलसी र ०३७ सालको काण्डमा झापाको प्रहरी कस्टडी भिजिट गरेको छु । झापा आन्दोलन पछाडि भएका झापाका प्रत्येक कार्यक्रममा म सहभागी छु । विकास निर्माणमा प्रत्यक्ष सहभागी भएको छु । मैले कति काम गरेको छु विर्तामोड, गौरादह, अर्जुनधारा गएर विकास निर्माणको काम हेरे पुग्छ । 

तपाईंको पार्टीले दुईपटक गरेको संसद् विघटनको विषय मतदाताले कसरी लिएका छन् ? नागरिकले यसलाई लिएर आफ्नो धारणा त पक्कै बनाएका होलान् ? 

त्यसले जनतालाई धेरै छुँदैन । यो जनताको प्रश्न होइन । सहरमा वौद्धिक जमातमा हुने बहस मात्र हो । 

यसको सोझो जवाफ ०५१ र ०५८ सालमा कांग्रेसले संसद् विघटन गरेको हैन ? दुवै बहुमत थियो त । हाम्रो पनि दुईतिहाइ नजिक थियो । तर, त्यो बहुमतनै हो । प्रधानमन्त्रीले संसद् विघटन गर्छन् । 

अदालतको फैसला मानेका छौँ । तर, त्यो फैसला गलत थियो । संसदीय शासन प्रणालीमा रहने अधिकार हो । भोलि पनि संसद्मा जाने दलले त्यो अधिकार प्रयोग गर्न सक्छन् । तर, अदालत भने कांग्रेसको पक्षमा उभिने ‘नेचर’को छ ।