सिमरा । बारा निर्वाचन क्षेत्र नम्बर–४ बाट प्रतिनिधिसभा सदस्यका लागि दुई पूर्वमन्त्रीसहित तीनजना प्रतिस्पर्धामा छन् । नेकपा (एमाले)का तर्फबाट पूर्वयुवा तथा खेलकुदमन्त्री एकवाल मियाँ र नेकपा (एकीकृत समाजवादी)बाट पूर्वश्रममन्त्री कृष्णकुमार श्रेष्ठ (किसान) चुनावी मैदानमा छन् ।

रोचक के भने मियाँ र श्रेष्ठ दुवै एमाले छाड्ने र प्रवेश गर्ने नेताहरू हुन् । मियाँ उमेदवारी दर्ता गर्ने अघिल्लो दिन एमालेमा फर्किएका थिए । उनी ०७४ सालको निर्वाचनमा एमालेले टिकट नदिने भएपछि पार्टी छोडेर महन्थ ठाकुर नेतृत्वको राजपाबाट चुनाव लडेर सांसद भएका थिए ।

श्रेष्ठले ०७४ मा तनहुँमा नेपाली कांग्रेसका नेता रामचन्द्र पौडेललाई पराजित गरेका थिए । गत वर्ष एमाले विभाजित हुँदा उनले मन्त्री हुने सर्तमा एकीकृत समाजवादी रोजेका थिए ।

एमाले उमेदवार मियाँ बाराको परवानीपुर गाउँपालिका–१ का बासिन्दा हुन् । एकीकृत समाजवादीका श्रेष्ठ तनहुँको व्यास नगरपालिका–४ का स्थानीय हुन् । तनहुँ छोडेर बारा आएर प्रतिस्पर्धामा रहेका श्रेष्ठ यस निर्वाचन क्षेत्रका मतदाता पनि होइनन् । उनी तनहुँका मतदाता हुन् ।

दुई पूर्वमन्त्रीबाहेक बारा–४ बाट कांग्रेसका इच्छाबहादुर वाग्ले स्वतन्त्र रूपमा उमेदवार बनेका छन् । उनी व्यवसायी हुन् । गठबन्धनका नाममा कांग्रेसलाई सिध्याउने खेल भएको भन्दै उनले स्वतन्त्र उमेदवारी दर्ता गराएका हुन् । वाग्लेको उमेदवारीसँगै यस क्षेत्रमा त्रिपक्षीय प्रतिस्पर्धा हुने देखिएको छ ।

उमेदवारहरू यति बेला चुनावी अभियानमा होभिएका छन् । यी तीनमध्ये एकीकृत समाजवादीका उमेदवार श्रेष्ठलाई कठिन हुने अनुमान गरिएको छ । सिमरा र यस आसपासमा जग्गा प्लटिङको कारोबार र होटेल व्यवसाय गर्दै आएका श्रेष्ठलाई उनकै कुनै बेलाका साझेदार वाग्ले स्वतन्त्र उमेदवार बनेकाले अप्ठेरो परेको हो ।

कांग्रेसले टिकट पाउने सम्भावनालाई उल्टाउँदै गठबन्धनबाट श्रेष्ठ उमेदवार बनेपछि सो पार्टीका नेता–कार्यकर्ता रुष्ट छन् । त्यही ‘सेन्टिमेन्ट’को फाइदा उठाउन वाग्ले प्रयत्नरत छन् ।

सत्ता गठबन्धनमा आबद्ध दलमध्ये यस क्षेत्रमा कांग्रेस निकै बलियो छ । गएको स्थानीय तह निर्वाचनको मतपरिणामानुसार यस क्षेत्रमा गठबन्धन दलतर्फ कांग्रेस पहिलो नम्बरमा छ । एकीकृत समाजवादी सबैभन्दा कमजोर छ ।

बारा–४ मा स्थानीय तहका ३८ वडा पर्छन् । तीमध्ये एकीकृत समाजवादीले तीन वडा– जीतपुरसिमरा–१०, विश्रामपुर–४ र प्रसौनी–३ मात्र जितेको थियो ।

कांग्रेस आठ वडामा विजयी भएको थियो । जीतपुरसिमरा उपमहानगरपालिकाका वडाहरू १, ५, २२, २४, कलैया उपमहानगरपालिका–१७, परवानीपुर गाउँपालिका–१, प्रसौनी गाउँपालिका–२ र विश्रामपुर गाउँपालिकाको ३ नम्बर वडा कांग्रेसले जितेको हो । सत्ता गठबन्धन दलभित्रका लोकतान्त्रिक समाजवादी पार्टी (लोसपा) र नेकपा (माओवादी केन्द्र)ले चार/चार वडा जितेका थिए ।

कांग्रेस, लोसपा र माओवादी केन्द्रभन्दा निकै कमजोर रहेको एकीकृत समाजवादीका श्रेष्ठ उमेदवार बनेका छन् । यस क्षेत्रमा बलियो जनमत रहेको कांग्रेसले प्रतिनिधिसभा र प्रदेशसभाका दुवै क्षेत्रमा टिकट पाएन । सोही कारण कांग्रेस कार्यकर्ता बढी निराश छन् ।

बारा–४ मा नेकपा (एमाले) बलियो देखिन्छ । गएको स्थानीय तह निर्वाचनमा एमाले एक्लैले १४ वटा वडा जितेको थियो । अहिले एमालेसँग तालमेलमा रहेको जनता समाजवादी पार्टी (जसपा) चार वडामा विजय भएको थियो । गठबन्धन र तालमेलबाहिर रहेको विवेकशील साझा पार्टीले एउटा वडा जितेको थियो ।

तनहुँका श्रेष्ठले बाराबाट टिकट पाएपछि एकीकृत समाजवादीका केही नेता–कार्यकर्ताले पार्टी छाडेका छन् । एमाले छाडेर एकीकृत समाजवादीको जिल्ला अध्यक्ष बनेका सुन्दर विश्वकर्मासहितका नेता–कार्यकर्ता यसअघि नै एमाले फर्किइसकेका छन् ।

कांग्रेसलाई शून्य पारेर प्रदेशसभाको दुई क्षेत्रमध्ये एउटामा माओवादी केन्द्र र अर्कोमा लोसपालाई साथमा लिएर अघि बढेका छन्, श्रेष्ठ । उनी कांग्रेस कार्यकर्ताले मत दिने र आफू विजयी हुने आसमा छन् । तर, कांग्रेसबाट लामो समय राजनीति गरेका वाग्ले उनका लागि पर्खाल बन्ने देखिन्छ ।

वाग्लेलाई कांग्रेसका केही कार्यकर्ताले साथ दिन थालेका छन् । होटेल तथा पर्यटन व्यवसायी उनी कमजोर उमेदवार नभएको तर्क गर्न थालिएको छ ।

श्रेष्ठका मुख्य प्रतिस्पर्धी भने एमाले उमेदवार मियाँ नै हुन् । ०७४ को निर्वाचनमा यही क्षेत्रबाट निर्वाचित मियाँ लोसपा छोडेर एमालेमै फर्किएका छन् । तत्कालीन राजपा (हाल लोसपा)बाट सांसदमा निर्वाचित हुनुअघि मियाँ एमालेमा सक्रिय थिए ।

उमेदवारी दर्तापछि श्रेष्ठले परवानीपुरमा निर्वाचन आचारसंहिताविपरीत चुनावी ब्यानरमुनि ‘फ्री भिसा फ्री टिकट’ भन्दै अन्तरक्रिया कार्यक्रम आयोजना गरेका थिए । सो विषयमा निर्वाचन आयोगले स्पष्टीकरण समेत सोधेको थियो ।

त्यसपछि श्रेष्ठले बाराकै जीतपुरमा आयोजित एक सार्वजनिक बहस कार्यक्रममा मतदातालाई अपशब्द प्रयोग गरे । त्यसले उनी निकै आलोचित बनेका थिए ।