काठमाडौं । नेकपा (एमाले)ले सातै प्रदेशमा फिल्मसिटी निर्माणको प्रतिबद्धता जनाएको छ ।

आउँदो मंसिर ४ गते हुने प्रतिनिधिसभा तथा प्रदेशसभा सदस्य निर्वाचनलाई लक्षित गर्दै एमालेले आज सार्वजनिक गरेको चुनावी घोषणापत्रमा सातै प्रदेशमा फिल्मसिटी निर्माण गरिने उल्लेख छ ।

“नेपाली चलचित्रको प्रवद्र्धन, विकास र विस्तार गरिनेछ । सम्भावनाका आधारमा सबै प्रदेशमा फिल्म सिटी निर्माण गरिनेछ,” घोषणापत्रमा उल्लेख छ ।

सरकारले हालसम्म एउटा पनि फिल्मसिटी बनाउन नसकिरहेका बेला एमालेले सातै प्रदेशमा फिल्मसिटीको योजना अगाडि सारेको हो । दशक नाघिसक्दा पनि दोलखामा निर्माण गर्ने भनिएको फिल्मसिटी अलपत्र छ । सरकारले कुनै वर्ष बजेट विनियोजन गरे पनि कुनै वर्ष बेवास्ता गर्दै आएको छ ।

काठमाडौं उपत्यकानजिकै इनडोर आउटडोर स्टुडियो बनाउने योजना एमाले अध्यक्ष केपी शर्मा ओली नेतृत्वको तत्कालीन सरकारले नै अगाडि सारेको थियो । तर, हालसम्म पनि त्यो अघि बढाइएको छैन ।