डडेलधुरा । ०७९ मंसिर ४ गते हुने निर्वाचनलाई प्रधानमन्त्री तथा नेपाली कांग्रेसका सभापति शेरबहादुर देउवाको अन्तिम चुनावको रुपमा हेरिएको छ ।
कांग्रेस डडेलधुराका नेताहरुले पनि अन्तिमपटक जिताउन भन्दै मत मागिरहेका छन् ।
आइतबार जिल्ला सदरमुकाममा आयोजित अन्तरक्रिया कार्यक्रममा सुदूरपश्चिमका सामाजिक विकासमन्त्री तथा प्रदेशसभातर्फ कांग्रेस उमेदवार गोविन्दराज बोहराले भने, “प्रधानमन्त्रीज्यू ६ पटक निर्वाचनमा विजयी भइसक्नु भएको छ । यो सातौंपटक हो । उहाँको अन्तिम चुनाव पनि हो ।”
देउवालाई ०४८, ०५१, ०५६, ०६४, ०७० र ०७४ सालको निर्वाचनमा कसैले पराजित गर्न सकेको छैन । पछिल्लो दुई निर्वाचनमा त एमालेले देउवाविरुद्ध उमेदवारी नै दिन छोडिसकेको छ ।
तर ०७९ मंसिर ४ गते हुने निर्वाचन देउवाका लागि अन्तिम भए त्यसपछिको नेता को हुने ? प्रश्नको जवाफ डडेलधुरा कांग्रेससँग पनि छैन ।
मंसिर ४ को निर्वाचनका लागि मनोनयन दर्ता भएसँगै प्रधानमन्त्री देउवापत्नी तथा कांग्रेस केन्द्रीय सदस्य आरजु राणा देउवाले डडेलधुरामा दौडधुप बढाएकी छन् ।
देउवाको उमेदवारी दर्तापछि झण्डै एकसाता जिल्ला सदरमुकाममा बसेकी आरजु केही दिन अगाडि मात्रै काठमाडौं फर्किएकी छन् ।
डडेलधुरा बसाइका क्रममा आरजुलाई कांग्रेसका नेता–कार्यकर्तासँगै अन्य दलका कार्यकर्ताले पनि भेटे ।
आरजुलाई भेट्नेले व्यक्तिगत र जिल्लाका समस्या सुनाए । अधिकांशले समस्या समाधानको आश्वासन पनि पाए । सोही क्रममा आरजुले गठबन्धन दलका नेतासँग संयुक्त बैठक पनि गरिन् ।
आरजुले पछिल्ला ५ वर्ष कैलालीको धनगढीलाई केन्द्र बनाएर राजनीति गरेकी थिइन् । उनी डडेलधुरा आउनै छोडिसकेकी थिइन् । तर एकाएक कैलाली निर्वाचन क्षेत्र नम्बर ५ छोडेर समानुपातिकको सुरक्षित सिट रोजिन् । त्योसँगै डडेलधुरामा बढाएको दौडधुपले धेरैले उनको राजनीतिक सक्रियताका रूपमा बुझेका छन् ।
कांग्रेस डडेलधुराका एक नेता भन्छन्, “दाई (शेरबहादुर)को यो अन्तिम चुनाव हो । त्यसपछि डडेलधुरामा कांग्रेसबाट चुनाव लड्ने उपयुक्त उम्मेदवार देखिँदैनन् । त्यसैले भाउजु (आरजु) ले अहिलेदेखि नै दौडधुप बढाएकी हुन् जस्तो लाग्छ ।”
यसकारण छोडिन् कैलाली
कैलाली क्षेत्र नम्बर ५ बाट ०७४ सालको निर्वाचनमा पराजित भए पनि आरजु सो क्षेत्र नियमित आउने–जाने गर्थिन् ।
त्यहाँ हुने सामाजिक र पार्टीका गतिविधिमा उनको निरन्तर सहभागिता हुने गरेको थियो ।
उनका गतिविधिबाट स्पष्ट हुन्थ्यो, उनी आफ्नो पक्षमा ०७९ को निर्वाचनका लागि माहोल बनाउन सक्रिय छन् ।
सो क्रममा कांग्रेस कैलालीका नेताको पनि भरपुर साथ थियो ।
कैलाली ५ बाट उनको एकल रुपमा नाम पनि सिफारिस भयो । यद्यपी अघिल्लो निर्वाचनमा आरजुलाई पराजित गरेको आरोप लाग्दै पार्टीबाट निष्कासित पूर्वराज्यमन्त्री पुष्करनाथ ओझा भने उनका लागि बाधक थिए ।
आरजुलाई साथ दिन पटकपटक ओझालाई गरिएको आग्रह सफल भएन ।
त्यसपछि आरजुको नाम सामानुपातिकको बन्द सूचीमा रहेको खबर ‘भाइरल’ नै भयो । उक्त खबरमा कैलाली निर्वाचन क्षेत्र नम्बर ५ का कांग्रेस नेता विश्वास गर्न सकिरहेका थिएनन् ।
तर आरजुले कैलाली ५ छोडेर डडेलधुरा रोज्ने मनसाय बनाइसकेकी थिइन् । कैलाली ५ बाट पराजित हुने भयले उनले डडेलधुरामा समानुपातिकको सुरक्षित सिट रोजेको चर्चा चल्यो ।
तर आरजु भने त्यो कुरा स्वीकार गर्न तयार छैनन् । “मैले कैलालीमा निर्वाचन लड्दा धेरै मेहनत र दौडधुप गर्नुपर्ने थियो,” आरजुले भनिन्, “तर मेरो पछिल्लो २ वर्षमा ४ वटा अप्रेसन भएको छ । स्वास्थ्यले साथ दिएको छैन । त्यसैले कैलाली छोडेकी हुँ ।”
तर कांग्रेस डडेलधुराका नेताहरु भने अब डडेलधुरालाई नै केन्द्र बनाएर राजनीति गर्ने योजना आरजुको रहेको दाबी गर्छन् ।
अब डडेलधुरामा फोकस भएर विकास गर्छु
नेपाली कांग्रेस केन्द्रीय सदस्यसमेत रहेकी आजुरले अब डडेलधुरामा नियमित आउजाउ गरिरहने बताएकी छन् ।
५ वर्ष डडेलधुराको माया मारेकी उनले भनिन्, “म धेरै वर्ष भयो यहाँ नआएको । म बिरामी पनि थिएँ, त्यसैले आउन पनि पाइन । अहिले मेरो नाम प्रतिनिधिसभाको सामानुपातिकतर्फ बन्द सूचीमा परेको छ । अब म लगातार जिल्लामा आइराख्छु ।”
डडेलधुराको विकासका लागि फोकस भएर काम गर्ने योजना उनको छ ।
“यहाँ वडादेखि नै मेरो टिम पनि छ,” आरजुले भनिन्, “निर्वाचनपछि सेक्टरअनुसार जिल्लामा वर्कसप राखेर यहाँका समस्या संकलन गर्छाैं । त्यसपछि डडेलधुराको विकासका लागि फोकस भएर लाग्छौं ।”
डडेलधुरा सदरमुकाममा सबैभन्दा सडकको समस्या रहेको बताउँदै उनले सडक विस्तारका लागि मुआब्जा पास भएर आइसकेकाले समस्या समाधान हुने दाबी गरिन् ।
“जिल्लाको योजनावद्ध विकास गर्ने मेरो र प्रधानमन्त्रीज्यूको परिकल्पना हो,” आरजुले भनिन्, “पुइलेकमा विमानस्थल निर्माणका लागि प्रक्रिया अगाडि बढिसकेको छ । मेडिकल कलेजको काम पनि अगाडि बढेको छ । परशुराम नगरपालिकामा एक सय शय्याको अस्पताल निर्माणको योजना पनि छ । अब विकास सदरमुकाममा मात्रै नभए ग्रामिण क्षेत्रमा पनि केन्द्रित गर्न आवश्यक छ ।”
घटालदेखि जोगबुढासम्म सुरुङ मार्ग निर्माणको योजना पनि रहेको उनले बताइन् । “त्यो सुरुङ मार्ग निर्माण भए घटालदेखि जोगबुढा पुग्न १२–१३ किलोमिटर मात्रै लाग्छ । त्यसले जिल्लालाई समृद्धितर्फ लम्काउँछ,” उनले भनिन् ।
गठबन्धनले ढुक्क
आजुरका अनुसार गठबन्धन अहिलेको आवश्यकता हो । गठबन्धनमा आवद्ध दलले एकअर्कालाई साथ दिनेमा कत्तिको ढुक्क हुनुहुन्छ ? भन्ने प्रश्नमा आरजुले भनिन्, “ढुक्क छु । राजनीतिमा जहिले पनि प्रतिस्पर्धा हुन्छ । सो क्रममा सबैले टिकट माग्नु उहाँहरुको अधिकारको कुरा हो । तर पार्टी सिस्टममा पार्टीको निर्णय मान्नु पनि अतिआवश्यक हो ।”
गठबन्धन अहिलेलाई मात्रै नभएर सरकार बनाउनका लागि पनि आवश्यक हुने उनको तर्क छ ।
“हामीले बनाएको संविधानअनुसार अब नेपालमा एउटै पार्टीको बर्चश्व भएर सरकार बन्ने सम्भावना कम छ,” उनले भनिन्, “त्यसैले अहिले गठबन्धन आवश्यकता हो ।”
