काठमाडौं । एन्फाको उपेक्षामा परेको नेपाली यू–१७ टोलीका मुख्य प्रशिक्षक उर्जन श्रेष्ठले एएफसी एसियन कप छनोट प्रतियोगितामा आफ्नो टिमको मुख्य लक्ष्य एसियन कपमा छनोट हुनु रहेको बताएका छन् । 

सके पहिलो नभए दोस्रो स्थानमा रहेर भए पनि छनोट हुने उनकाे भनाइ छ । 

‘‘प्राथमिक लक्ष्य भनेको छनोट हुने नै हो । त्यसो हुन नसके कमसेकम समूहमा दोस्रो हुने र छनोटको ढोका खुला राख्ने हाम्रो चाहना हो,’’ नेपाली यू–१७ टोलीका मुख्य प्रशिक्षक श्रेष्ठले भियतनाममा भने, ‘‘समूहमा बलिया टिम छन् । हामी पनि बलियो नै छौँ । हामी राम्रो खेल देखाउन चाहन्छौँ ।’’

नेपाल रहेको समूहमा थाइल्यान्ड, भियतनाम र चाइनिज ताइपेई छन् । प्रतियोगितामा दश समूहका दश टिम र उत्कृष्ट ६ उपविजेताले फाइनल चरणमा स्थान पक्का गर्नेछन् ।

‘‘समूहका अरू तीन टिमको खेल हामीले देखेका छैनौँ । तर, मलाई लाग्छ यो उमेर समूहमा लगभग सबै टिमको स्तर उस्तै हुन्छ । सबै टिमका खेलाडी सिकाइकै क्रममा हुन्छन् । सबै टिमका किशोर खेलाडी जोसिला नै हुन्छन्,’’ नेपाल रहेको समूह ‘एफ’का प्रतिद्वन्द्वीबारे प्रशिक्षक श्रेष्ठले भने, ‘‘मुख्य कुरा खेलाडीले मैदानमा प्रशिक्षकको योजनाअनुसारले खेल्न सक्छन् कि सक्दैनन् भन्ने हो । जुन टिमले प्रशिक्षकको योजना सफल बनाउँछ, त्यही टिमले नतिजा आफ्नो पक्षमा पार्छ ।’’

नेपाली टोलीले भियतनाम जानुअघि श्रीलंकामा यू–१७ साफ च्याम्पियनसिप खेलेको थियो । जहाँ नेपाल उपविजेता बनेको थियो । ६ टिम सहभागी साफ च्याम्पियनसिपमा नेपाल समूह ‘बी’को विजेता बनेको थियो । नेपालले समूह चरणमा बलियो प्रतिद्वन्द्वी भारतलाई ३–१ ले हराएको थियो । तर, फाइनलमा नेपाल त्यही भारतसँग ४–० ले पराजित भएपछि उपविजेतामा चित्त बझाउनु परेको थियो । 

श्रीलंकामा सम्पन्न साफ च्याम्पियनसिपको टोलीमा प्रशिक्षक श्रेष्ठले दुई खेलाडी परिवर्तन गरेका छन् । श्रेष्ठले मिरिक लिङ्देन र प्रितम कार्कीको स्थानमा राम थापा र श्रेयान्स मानन्धरलाई टोलीमा समावेश गरेका छन् । प्रशिक्षक श्रेष्ठले प्रतियोगिताअघि टिमले केही दबाब महसुस गर्नु स्वभाविक भएको बताए । 

‘‘जित र हारको दबाब त हुन्छ नै । अन्तर्राष्ट्रिय प्रतियोगिता हो । उमेर समूहकै भए पनि राष्ट्रिय टिम हो । त्यसकारण जित्नै पर्छ भन्ने दबाब महसुस हुन्छ । यो स्वाभाविक हो,’’ प्रशिक्षक श्रेष्ठले भने, ‘‘यो प्रतियोगिता नेपाली फुटबलका लागि आफ्नो स्तर र प्रतिभा देखाउने मञ्च पनि हो । यहाँ राम्रा खेल्न सके, एसियाली मञ्चमा नेपाली फुटबलले प्रतिस्पर्धा गर्नसक्छ भनेर फेरि एकपटक प्रमाणित हुनेछ ।’’

मलेसियामा १२ घण्टाको ‘ट्रान्जिट‘पछि नेपाली टोली सोमबार नेपाली समयअनुसार २ः३० बजे भियतनाम पुगेको थियो । भियतनाममा नेपाली टोलीले सोमबार साँझ पहिलो अभ्यास सेसन सकेको छ । जुन भियतनामी वातावरण, मैदानसँग घुलमिल हुने प्रयास थियो । प्रशिक्षक श्रेष्ठले सबै खेलाडी फिट भएको बताएका छन् । 

‘‘जहाजमा लामो समयको यात्रा गरेर आइयो । यसकारण रिकोभरीको आवश्यकता थियो । हामीले पहिलो सेसनको प्रशिक्षण सकेका छौँ । सबै खेलाडी फिट छन्,’’ प्रशिक्षक श्रेष्ठले प्रतियोगितामा आफ्नो रणनीतिबारे भने, ‘‘हाम्रो योजना ४–३–२–१ संरचनामा खेल्ने छ । बल पाएका बेला आक्रमण गर्ने, नभए अनुशासित भएर रक्षात्मक खेल्ने । दुवै रणनीतिमा सम्हालिएर खेल्नेछौँ । हतार गर्नेछैनौँ । सुरुवाती समयमा विपक्षीको खेल पनि बुझ्नु पर्छ । उनीहरू पनि सुरुमा त हामीलाई बुझ्ने कोसिस गर्लान् । त्यसकारण सुरुबाटै प्रेसिङ गेम नहुन सक्छ ।’’

नेपालले पहिलो खेल अक्टोबर ५ मा थाइल्यान्डविरुद्ध, अक्टोबर ७ मा भियतनाम र अक्टोबर ९ मा चाइनिज ताइपेईविरुद्ध खेल्नेछ । 

‘‘थाइल्यान्ड वा अरू विपक्षी टिमले साफ च्याम्पियनसिपमा हाम्रो खेल हेरे होलान् । यसकारण उनीहरूलाई हाम्रो खेल शैलीबारे केही जानकारी त अवश्य हुनुपर्छ । तर यसलाई म सकारात्मक पाटोबाट पनि हेर्छु । हामीले श्रीलंकामा राम्रो खेलेका थियौँ । यसकारण यहाँ अन्य टिमले हामीलाई यहाँ कमजोर आँक्ने छैनन्,’’ प्रशिक्षक श्रेष्ठले भने, ‘‘हाम्रा लागि थाइल्यान्ड पहिलो तगारो हो । थाइ टिमविरुद्ध हाम्रो रणनीति कत्तिको सफल हुन्छ । साथै, भियतनाम र चाइनिज ताइपेईबीचको खेल हामी नियाल्नेछौँ । यी सबै कुरालाई विश्लेषण गरी बाँकी दुई खेलका लागि रणनीति बनाउने छौँ ।’’

नेपाली टिम : 
गोलकिपर : समिर चन्द, रुविन भोगाटी, कृशल मोक्तान

रक्षक : मदन पौडेल, युनिस मगर, दीपक थापामगर, निशान्त तामाङ, विक्रम तामाङ, सेमन्त थापा, अश्विन घोरासैनी, धिरज विश्वकर्मा, राम थापा 

मिडफिल्डर : हरिशराज भट्ट, प्रशान्त लक्षम, विनोद केसी, श्रेयान्स मानन्धर, निरज कार्की, सारोज दर्लामी, युनिश बुढाथोकी, लचु थापा,  धनसिंह विक

फरवार्ड : सुवास बम, सिजल राई