काठमाडौं । नेपालका मुख्य प्रशिक्षक कुमार थापाले फाइनलअघि ‘उहाँहरूले हामीलाई इनर्जी दिनुहुन्छ, हामी ट्रफी दिन्छौँ’ भनेर दर्शकलाई रंगशालामा आउन आह्वान गरेका थिए । 

नेपाली चेलीहरूको आह्वानमा समर्थक रंगशालामा ओहिरिएका थिए । रंगशालामा उपस्थित झन्डै १६ हजार दर्शकलाई स्तब्ध बनाउँदै बंगलादेशले साफ महिला च्याम्पियनसिपको उपाघि उचालेको छ । मिडफिल्ड र रक्षापंक्तिको राम्रो तालमेल नमिल्दा पहिलो हाफमै दुई गोल खाएपछि नेपाल सोमबार ऐतिहासिक उपलब्धिबाट चुकेको छ । घरेलु मैदानमा पहिलोपटक साफको उपाधि उचाल्ने नेपालको सपनालाई बंगलादेशले चकनाचुर बनाइदिएको छ । 

श्रीमोतिकृष्णरानी सरकारको दुई तथा वैकल्पिक खेलाडी सामसुनाहर एक गोलमा बंगलादेशले नेपाललाई ३–१ ले पराजित गर्दै पहिलोपटक साफ महिला च्याम्पियनसिपको उपाधि जित्न सफल भएको हो । दोस्रोपटक फाइनल खेलेको बंगलादेशले उपाधि जितेको यो पहिलोपटक हो । बंगलादेशले २०१६ मा पनि फाइनल खेलेको थियो । 

यससँगै बंगलादेश प्रतियोगिताको नयाँ विजेता बन्न सफल भएको छ । यसअघि सम्पन्न पाँच संस्करणकै उपाधि भारतले जितेको थियो । तर, यसपटक भारत सेमिफाइनलमा नेपालसँग १–० ले पराजित हुँदै प्रतियोगिताबाट बाहिरिएको थियो । नेपाल भने पुन: एकपटक उपविजेतामा चित्त बुझाउन बाध्य भएको छ । 

नेपाल यसअघि २०१०, २०१२, २०१४ र २०१९ मा पनि उपविजेता बनेको थियो । यसअघि सबै फाइनलमा नेपाल भारतसँग पराजित भएको थियो । यसपटक नेपाललाई उपाधि यात्रालाई बंगलादेशले पूर्णविराम लगाइदिएको छ । साफ महिला च्याम्पियनसिपमा नेपाल बंगलादेशसँग पराजित भएको यो पहिलोपटक हो । 

२०१० र २०१९ मा नेपाल बंगलादेशसँग समान ३–० को नतिजामा विजयी भएको थियो । २०१४ मा भने नेपाल १–० ले विजयी भएको थियो । तर, विगतको नतिजालाई नेपालले घरेलु मैदानमा भने दोहर्याउन सकेन। 

त्रिपुरेश्वरस्थित दशरथ रंगाशालामा बंगलादेशले १५ औँ मिनेटमा वैकल्पिक खेलाडी सामसुनाहरको गोलबाट अग्रता लिएको थियो । दसौँ मिनेटमा जहन शोपनाको स्थानमा मैदान प्रवेश गरेकी सामसुनाहरले मोनिका चक्माको क्रसलाई पोस्टको दिशा दिएकी थिइन् । 

वर्षाका कारण हिलाम्मे बनेको रंगशालामा पहिलो हाफ सकिन तीन मिनेट बाँकी हुँदा श्रीमोतिकृष्णरानी सरकारले बंगलादेशको अग्रता दोब्बर बनाइन् । सरकारले कप्तान सविना खातुनको पासमा गोल गरेकी थिइन् । 

७० औँ मिनेटमा अनिता बस्नेतले गरेको गोलबाट नेपालले पुनरागमनको प्रयास गरेको थियो । तर, ७७ औँ मिनेटमा श्रीमोतिकृष्णरानी सरकारले अर्को गोल थपेपछि बंगलादेशको जित पक्का भएको थियो । 

बंगलादेशकी सरकारले पहिलो मिनेटमै गरेको प्रहारलाई नेपालकी गोलकिपर एञ्जिला तुम्बाप्पो सुब्बाले बचाइएकी थिइन् । त्यस्तै ३६ औँ मिनेटमा नेपालकी अनिता बस्नेतको फ्रीकिक बंगलादेशकी गोलकिपर रूपना चक्माले पन्च गरेर बचाइदिएकी थिइन् । लत्तगै प्राप्त कर्नरमा पनि नेपाल अभागी रह्यो । बंगलादेशका रक्षकले गोललाइनबाट बल क्लियर गरिदिएका थिए । 

दोस्रो हाफको सुरुमै नेपालका प्रशिक्षक कुमार थापाले अनिता केसीको स्थानमा मुख्य स्ट्राइकर सावित्रा भण्डारीलाई मैदान छिराएका थिए । तर, डेंगीबाट थलिएर तङ्ग्रिएकी सावित्राले पनि बंगलादेशको बलियो रक्षापंक्ति तोड्न सकिनन् । 

५२ औँ मिनेटमा अनिता बस्नेतको क्रममा पेनाल्टी बक्समा अनमार्क रहेकी रश्मीकुमारी घिसिङले गरेको हेडिङ प्रहार थोरैले बाहिरिएको थियो । त्यस्तै ४८ औँ मिनेटमा अनिताकै कर्नरमा दीपा शाहीले गरेको हेड प्रहार बंगलादेशकी गोलकिपरे मुश्किलले बचाएकी थिइन् । 

तस्बिरहरू : सुनिल प्रधान र अभिषेक महर्जन/बाह्रखरी