काठमाडौं । उपत्यका विकास प्राधिकरणले सेतो मच्छिन्द्रनाथको रथयात्रा हुने बाटोमा बनाइएको कंक्रिट संरचना हटाएको छ । वडा २८ का जनप्रतिनिधि, सेतो मच्छिन्द्रनाथ रथयात्रा व्यवस्थापन समिति, स्थानीय, सम्पदाप्रेमी लगायतको पहलमा प्राधिकरणले उक्त संरचना हटाएको हो ।

स्थानीय तह लगायत कुनै पनि निकायसँग समन्वय नगरी प्राधिकरणले रानीपोखरी प्रहरी कार्यालय भवन र आकाशेपुलबीचको बाटोमा कंक्रिट संरचना बनाएको थियो ।

बाटोमा हिँड्ने पैदलयात्री र रथयात्रालाई असर गर्नेगरी बनाइएको संरचना हटाउनुपर्ने स्थानीय सेता मच्छिन्द्रनाथ रथयात्रा व्यवस्थापन समिति, स्थानीय, सम्पदा संरक्षणकर्मीहरुले विरोध गरेका थिए ।

त्यसपछि वडा नम्बर २८ का वडाध्यक्ष भाइराम श्रेष्ठले प्राधिकरणलाई पत्र पठाएका थिए । प्राधिकरणले ठूलो आधुनिक बत्ती राख्ने प्रयोजनका लागि कंक्रिट संरचना बनाएको बताएको छ ।