काठमाडौं । प्रमुख प्रतिपक्ष दल नेपाली कांग्रेसका नेता एवं पूर्वमन्त्री डा. मीनेन्द्र रिजालले प्राथमिकताका आधारमा बजेट विनियोजन गरिनुपर्ने बताएका छन् । सरकारले आउँदो आर्थिक वर्षको बजेट निर्माणको काम गरिरहेका बेला उनले यस्तो सुझाव दिएका हुन् ।

शनिबार काठमाडौंमा आयोजित उद्यमशीलता, उद्यमी र बजेट विषयक अन्तरक्रिया कार्यक्रममा नेता रिजालले सरकारले ल्याउने गरेको बजेट बजेटजस्तो नभएको टिप्पणी पनि गरे । पञ्चवर्षीय योजना योजनाजस्तो नभएको उनको भनाइ थियो ।

सीमित स्रोत भएकाले बजेट बनाउँदा प्राथमिकताका क्षेत्र छुट्ट्याउनुपर्नेमा उनले जोड दिए । सबैथोक बराबरी समेट्ने विषय बजेटमा हुनै नसक्ने उनको तर्क थियो ।

“हाम्रो बजेट बजेटजस्तो छैन । हाम्रो पञ्चवर्षीय योजना योजनाजस्तो छैन । सबै चिज गर्छु भन्नु योजना होइन,” उनले भने, “तपाईंसँग लिस्ट छैन भने तपाईंले जतिसुकै गर्छु भने पनि अथवा यो पनि गर्छु, यो पनि गर्छु भन्नु द्याट्स नट बजेट । लिमिटेड रिसोर्सेसमा प्राथमिकता छुट्ट्याउनुपर्छ – के गर्ने, के नगर्ने ।”

नेता रिजालले प्राथमिकता तयबिना विनियोजित बजेटले काम गर्न नसक्ने तथ्य औँल्याए । न्युज एजेन्सी नेपाल