केही साता यता काठमाडौं उपत्यकामा बिजुली बढी नै जानेआउने गर्न थालेको छ । यसले उपभोक्तालाई दिक्क त बनाएको छ नै विद्युतीय उपकरण बिग्रने जोखिम पनि बढाएको देखिन्छ ।

विद्युत् प्राधिकरणले भने बिजुली गडबडीको कारण सार्वजनिक गरेको छैन । यसैले अहिलेको अव्यवस्थाका कारणहरू बारे अनेकौं टिप्पणी गरिएको सुनिन्छ । यथार्थ थाहा नदिएपछि अनुमान त हुने नै भयो । 

बर्खा लागेपछि विद्युत् उत्पादन बढेको भन्दै नेपाल विद्युत् प्राधिकरणले भारततर्फ बिजुली निर्यात गर्न थालेको छ । हिउँदमा भातबाट किनेर नेपालमा विद्युत् वितरण गरिन्छ । यसैले किनबेच स्वाभाविकै देखिन्छ ।

यसैपनि बर्खामा उत्पन्न हुने बढी बिजुली जोगएर राख्न त सकिँदैन । खपतभन्दा बढी बिजुली नबेच्ने हो भने खेर जान्छ । खेर फाल्नुभन्दा त बेच्नु नै बुद्धिमानी हुन्छ ।

केहीले भारतलाई बिजुली बेचेकाले नेपालमा आपूर्ति अनियमित भएको तर्क गर्न थालेका छन् । तर,बिजुली आउनेजाने क्रम हेर्दा यो तर्क सही देखिँदैन । बर्खा याममा नदीमा पानी बढ्दा विद्युत् उत्पादन पनि त बढ्छ ।

नेपाल विद्युत् प्राधिकरणकै लापरवाहीका कारण विद्युत् आपूर्ति अनियमित भएको भने यथार्थ हो । विद्युत् आपूर्तिमा देखिएको अनियमितताको प्रकृति हेर्दा वितरणमा प्रयोग भएका कमसल उपकरण यसको कारकजस्तो देखिन्छ ।

यसैगरी केही साता यता बिजुली आउन छाडेको सूचना दिने ठाउँ  'नो लाइट' शाखाको टेलिफोनमा सम्पर्क गर्न धेरै कठिन बनाइएको छ । सामान्य उपभोक्ताले गुनासो गर्न पनि निकै समय लगाउनुपर्ने हुन्छ । 

नेपालका विद्युत् उपभोक्तालाई यति धेरै हेप्न त नहुने हो । वितरणमा प्राधिकरणको एकलौटी भएकाले जनतासँग छान्ने सुविधा छैन । तर, के यही कारणले राज्यको स्वामित्व भएको प्रधिकरणले यसरी जनतालाई हेप्नु न्यायोचित होइन । 

सम्भवतः सहरी क्षेत्रमा विद्युत् वितरणका लागि प्रयोग गरिने उपकरणहरूको खरिदमा भएको भ्रष्टाचारका कारण आपूर्ति अनियमित भएको हुनसक्छ । खरिदमा अनियमितता गरिएकै कारण प्राधिकरण व्यवस्थापन मौन रहन बाध्य भएको त होइन? 

कारण जेसुकै भए पनि विद्युत् आपूर्तिमा भएको गडबडी कुनै पनि बेला ठूलो दुर्घटनाको कारण बन्न सक्छ । त्यस अवस्थामा दुर्घटनाका कारण हुने क्षतिको दोष प्राधिकरणमाथि नै लाग्नेछ ।

आपूर्ति कम भएकै कारण वितरणमा समस्या भएको हो भने उपभोक्तालाई त्यसको कारण जानकारी गराउनु प्राधिकरणको कर्तव्य हो । विद्युत् कटौतीको कार्यतालिका नै निकालेर आपूर्ति बन्द गर्दासमेत उपभोक्ताले सहेका थिए ।

उपकरणमा सुधार र सुदृढीकरण गर्नुपर्ने भए तत्काल गरेर र अरू कारण भए जनतालाई जानकारी आपूर्तिमा भइरहेको अहिलेको गडबडी तत्काल अन्त्य गरियोस् । प्राधिकरणबाट सन्तोषजनक सेवाको माग गर्नु उपभोक्ताको ज्यादती त होइन नि !