काठमाडौं । पूर्वप्रधानमन्त्री डा. बाबुराम भट्टराईले गैरआवासीय नेपाली (एनआरएनए)लाई पूर्ण अधिकारसहितको नागरिकता दिने पक्षमा आफू रहेको बताएका छन् । शुक्रबार नयाँ बानेश्वरस्थित संसद् भवनमा सञ्चारकर्मीलाई संक्षिप्त प्रतिक्रिया दिँदै भट्टराईले अहिले एनआरएनएलाई राजनीतिक अधिकार बाहेकका अन्य अधिकार दिनेबारे छलफल भइरहेको तर आफू पूर्ण अधिकारसहितको नागरिकता दिनुपर्ने पक्षमा रहेको बताए ।

"अझै अपूर्ण छ । जन्मसिद्धका सन्तानले वंशीय नागरिकता पाउनेकुरा त आएको छ । त्यो मुलतः ठिक छ । एनआरएनएहरूलाई मेरो निजी मान्यता त उनीहरूलाई पूर्ण नागरिकता दिए हुन्छ भन्ने हो । तैपनि राजनीतिक अधिकार बाहेकका अन्य अधिकारसहितका नागरिकता दिने कुरा छ, त्यो पनि सकारात्मक छ," उनले भने ।

उनले आमाको नामबाट नागरिकता दिने विषयमा सर्तहरू तेर्स्याइनु गलत भएको पनि बताए । आमाको नाममा निसर्त नागरिकता दिनुपर्ने उनको भनाइ छ ।

"कमजोर पक्ष के छ भने आमाको नामबाट नागरिकता प्राप्त गर्ने जुन अधिकार हो त्यो निसर्त अधिकार हो । अनावश्यक ढंगले सर्त राखेर आमाले बाउको पहिचान भए, नभएको भनेर जुन सर्त राखिएको छ । त्यो विभेदकारी छ । गलत छ । वैवाहिक अंगिकृतको कुरा पनि समानतामा आधारित छैन । कि त नराख्ने हो भने छोरा र छोरी दुवैको दम्पतीलाई नराखौँ । राख्ने हो भने दुईवटैलाई थोरै थोरै भएपनि राखौँ । यसरी विभेदकारी प्रावधान राख्नु हुँदैन," उनले भने ।