काठमाडौं । प्रधानमन्त्री केपी शर्मा ओलीले कार्यदल गठन गर्ने बैठकमा गृहमन्त्री रामबहादुर थापा बादललाई पनि सहभागी गराएपछि नेकपा एमालेको आन्तरिक एकताको प्रयास पुनः धकेलिएको छ ।
गृहमन्त्री थापा बादलमा उपस्थित गराउनुको निहितार्थ एमाले एकताको मुख्य आधार बनाइएको २०७५ जेठ २ मा फर्कन ओलीले अनिच्छा देखाएको नै रहेको खनाल–नेपाल समूहले निष्कर्ष निकालेका छन् । यही कारणले शुक्रबार नै गठन गर्नुपर्ने कार्यदल शनिबार पनि गठन हुन सकेन । कार्यदलमा बादल पनि सहभागी गराइए अस्वीकार गर्नुपर्ने केही सदस्यहरूको मत रहेको खनाल–नेपाल समूहका नेता बताउँछन् ।
एमाले वरिष्ठ नेता झलनाथ खनाल र माधवकुमार नेपाल समूहले शुक्रबार र शनिबार केन्द्रीय सदस्यहरूसँग जुम मिटिङमार्फत् छलफल गरेको थियो । भर्चुअल बैठकमा सहभागी अधिकांश केन्द्रीय सदस्यहरूले प्रधानमन्त्री केपी शर्मा ओलीप्रति शङ्का व्यक्त गरेका हुन् ।
“शुक्रबार अलिअलि साथीहरू जोडिनुभएको थियो । शनिबार अधिकांश साथीहरू जोडिनुभयो । पार्टी एकताको आधार २०७५ जेठ २ लाई बनाउनुपर्छ । पार्टी एकतापूर्वको पार्टीको सांगठनिक संरचना–निकायहरू, नीति, नेतृत्व स्वीकार्न तत्पर हुन्छन् भने एकताको प्रयास गरौँ भन्ने नै छ,” स्थायी कमिटी सदस्य युवराज ज्ञवाली भन्छन् ।
जेठ २ मा फर्किए पनि कम्युनिस्ट पार्टी बन्दैन
प्रधानमन्त्री ओलीले एकताको नाममा अल्मल्याउन खोजेको अधिकांश खनाल–नेपाल समूहका नेताहरूले सामूहिक निष्कर्ष निकालेका छन् । ओलीको विगतको चरित्र, कार्यशैली, चिन्तन, मनोदशा अध्ययन गर्दा पनि उनी एकता–विरोधी नै ठहर हुने सदस्यहरूले बुझाइ व्यक्त गरेका थिए ।
“केहीकेहीको जेठ २ मा पुगेर पनि कम्युनिस्ट पार्टी बन्नेवाला छैन । यो पार्टीले समाजवादी आन्दोलनको अगुवाइ गर्न सक्दैन, नयाँ ढङ्गले जानुपर्छ भन्ने निचोड सुनाएका थिए,” ज्ञवाली थप्छन्, “त्यो सङ्ख्या पनि सानो छ । अधिकांशको जेठ २ मै फर्किएर सहमति खोज्ने प्रयास गरौँ । जेठ २ को सङ्गठनात्मक ढाँचाअनुसार फर्कन सम्भव छैन, देखिएन भने नयाँ ढङ्गले बढिहाल्नुपर्छ, ढिला गर्नुहुँदैन भन्ने आम धारणा छ ।”
उपचुनाव नजिकिँदा मिल्न दबाब
नेकपा विग्रहले रिक्त गराएको राष्ट्रिसभा सदस्यमा जेठ ६ गते उपचुनाव हुँदैछ । एमाले विग्रहकै कारण एमाले–एमाले बीच प्रतिष्पर्धा हुने भएको छ । गृहमन्त्री रामबहादुर थापा बादल र संघीयता (विकेन्द्रीकरण)विद् डा. खिमलाल देवकोटा मैदानमा छन् । बादल एमालेको सूर्य चिह्नधारी उमेदवार हुन् । गठबन्धनकातर्फबाट खनाल–नेपालपक्षीय देवकोटा छन् ।
एमाले विवाद नमिल्ने हो भने बादल जित्न कठिन हुने आकलन ओली स्वयम्ले पनि गरेका छन् । राष्ट्रियसभा एमाले एक्लैको ५ हजार १३० मत रहेकाले पार्टी मिल्नु अनिवार्यजस्तै भएको नेताहरू बताउँछन् ।
बादलको स्वीकारोक्ति बढोस् र नेता खनाल–नेपाल समूहलाई जेठ २ वरै सहमतिको विन्दु खोज्न दबाब होस् भनेर ओलीले एमाले मिलाउने बैठकमै प्रविष्ट गराएका थिए ।
त्यसले संशय उत्पन्न गराएको र ओली जेठ २ मा फर्कन तत्पर नदेखिएको सन्देश प्रवाह भएको ज्ञवालीको पनि बुझाइ छ । “बादल बैठकमा ल्याएपछि त्यसले संशयचाहिँ उत्पन्न गराएको छ,” उनले बाह्रखरीसँग भने ।
खनाल–नेपालनिकट केन्द्रीय सदस्यहरूले उपचुनावअघि नै छिनोफानो गर्नुपर्ने बताएका छन् ।
“दुई–तीन दिनभित्रै वारपारको दिशामा जानुपर्छ । अब अल्मलिनुहुँदैन भन्ने आम नेताहरूको धारणा रहेको छ,” केन्द्रीय सदस्य सुरेन्द्र मानन्धर भन्छन् ।
