काठमाडौं । राष्ट्रपति निवास शीतल निवासमा प्रधानमन्त्री केपी शर्मा ओली र माधवकुमार नेपालबीच विवाद साँघुर्याउने समझदारी भएको छ ।
राष्ट्रपति विद्यादेवी भण्डारीलाई साक्षी राखेर ओली–नेपालबीच समानान्तर गतिविधि नगर्ने, विवादलाई थप नचर्काउने र स्पष्टीकरण पत्र थमाएर जवाफ माग गरिएका वरिष्ठ नेता झलनाथ खनाल र नेता नेपाल पक्षका ३० जना नेता, सांसदहरूमाथिको कारबाही फिर्ता लिने समझदारी भएको एमाले उच्च स्रोतले जानकारी दियो ।
उच्च स्रोतका अनुसार अहिले बालुवाटारमा प्रधानमन्त्री ओलीले आफूनिकट नेताहरूसँग परामर्श, छलफल गरिरहेका छन् । आजै बैठक बसेर कारबाही फिर्ता र जेठ ६ गते उपनिर्वाचनका लागि उमेदवार टुङ्ग्यायने विषयमा निर्णय लिने बताइएको छ ।
एमालेको विश्वसनीय स्रोतले बाह्रखरीलाई जानकारी दिएअनुसार बिहीबार अपराह्न ४ः२५ बजे प्रमुख प्रतिपक्षी दलका नेता शेरबहादुर देउवा भेट्न उनकै निवास पुगेका माधव नेपाल साँझ ७ बजे शीतल निवास प्रविष्ट भएको थिए ।
भेटको पहल राष्ट्रपतिले भण्डारीले नै गरेको स्रोतको जिकिर छ । नेता नेपाल पक्षका नेताहरूले पनि संवादका लागि राष्ट्रपति भण्डारीले धेरै पटक आग्रह गरेको बताउँदै आएका छन् ।
स्रोतका अनुसार नेपाल पुगेको केही बेरपछि प्रधानमन्त्री केपी शर्मा ओली पनि शीतल निवास छिरेका थिए । उनीहरूबीच सवा १० बजेसम्म संवाद भएको स्रोतले बतायो । भेट सकेर सुरुमा नेता नेपाल बहिर्गमन भएका थिए । त्यसको आधा घण्टापछि ओली निस्किएको स्रोत बताउँछ ।
के भयो शीतल निवासमा कुराकानी ?
प्रधानमन्त्री केपी शर्मा ओलीले विश्वासको मत लिने प्रयोजनका लागि वैशाख २७ गते बोलाइएको संसद्को विशेष अधिवेशनको तिथि नजिकिँदै जाँदा बिहीबार राजनीतिक दौडधुप तीव्र बन्यो । दिउँसो विष्णु पौडेल, घनश्याम भुसाल, योगेश भट्टराई सहितका नेता दरबार मार्गको याक एण्ड यति होटलमा बसेर विवाद साँघुर्याउने विषयमा छलफल गरे । अपराह्न साढे पौडेल, सुरेन्द्र पाण्डे र गोकर्ण विष्ट मेरियटमा होटलमा छलफलमा बसेका थिए । छलफलमा मूर्त कुराकानी नभए पनि सकारात्मक थालनी भएको सुरेन्द्र पाण्डेले बाह्रखरीलाई जानकारी दिएका थिए ।
राति शीतल निवासमा ओली र नेपालबीच सघन संवाद भएको स्रोतको दाबी छ ।
एमाले स्रोतका अनुसार खनाल–नेपाल समूहका केही नेताहरू अनौपचारिक हिसाबले ओलीसँग संवादमा थिए । उनीहरूले आधा घण्टा भए पनि २०७५ जेठ २ सम्मै कायम रहेको पार्टी केन्द्रीय कमिटीको बैठक बोलाउने र त्यसैले निर्णय गरेर अघि बढ्ने विकल्प सुझाएका थिए । त्यसो हुँदा तिक्तता केही हदसम्म मत्थर हुने उनीहरूको बुझाइ थियो ।
“खनाल–नेपाल समूहभित्र विवाद साँघुर्याउनुपर्छ । ओलीले टेक्ने ठाउँ दिनुपर्छ भन्ने मत बाक्लो बन्दै थियो,” एमाले स्रोत भन्छ, “माधवकुमार नेपाल पक्षका साथीहरू ६ बुँदे लिएर पनि हिँड्नु भएको थियो । तर, हिजोचाहिँ विवाद थप नबढाउने, गुटका भेला, समानान्तर गतिविधि रोक्ने र कारबाही फिर्ता गर्ने समझदारी भएको छ ।”
पछिल्लो समय नेता नेपाल र उनी निकटस्थहरूले कारबाही फिर्ताको ग्यारेन्टी खोजेको ओलीनिकट नेता बताउँछन् । “त्यो आश्वासन, ग्यारेन्टी प्रधानमन्त्रीले गरिदिएर मात्रै हुँदैन । राष्ट्रपतिले नै भनिदिनुपर्यो भन्ने उहाँहरूको भनाइ थियो । खासगरी माधवको तर्फबाट त्यो आशय प्रकट भएको थियो,” एमाले स्रोतको जिकिर छ ।
नेता नेपाल शीतल निवासमा सघन संवादमा जुटिरहँदा उनी पक्षका घनश्याम भुसाल, योगेश भट्टराईसहित बालुवाटारमा प्रधानमन्त्रीसँग छलफल गरेकाे एमालेका नेता बताउँछन् ।
एमाले स्रोतले आजै (शुक्रबार) नै परिणाम निस्कनेगरी संवादको प्रक्रिया अघि बढेको पनि बताएका छन् ।
