काठमाडौं । काठमाडौंको व्यस्त चोकमध्येको एक हो कृष्ण पाउरोटी चोक ।  नजिकै छ प्रहरी प्रधान कार्यालय भने अर्कोतिर छ सिंहदबार ।  सोही व्यस्त चोकमा मंगलबार बिहान करिब ८ बजे बा ६ च ५५१९ नम्बरको स्कोर्पियो अघि बढ्दै थियो । 

प्रहरी स्रोतले दिएको जानकारीअनुसार उक्त गाडीलाई सादा पोशाकमा रहेका प्रहरीले पिछा गरिरहेको थियो । उक्त गाडीलाई कृष्ण पाउरोटी चोकमा पनि रोक्न नखोजिएको होइन । रोक्न खोज्दाखोज्दै गाडी अगाडि बढ्यो । गाडी कताबाट आएको थियो भन्ने प्रहरीले खुलाउन चाहेको छैन तर उक्त गाडी बीचको बाटोबाट दरबारमार्गतर्फ अघि बढ्यो । 

प्रहरीका अनुसार उक्त गाडी कमलादीमा रहेको नबिल बैंकको नजिकैबाट अघि बढ्दै थियो । गाडीबाट सेतो रङको कपडाको झोला बाहिर फालियो । गाडी अघि बढ्यो । सादा पोशाकमा रहेका प्रहरीले उक्त झोला फेला पारे । सोही झोलामा १५ किलो सुन र दुई थान चाइनिज पेस्तोल पनि रहेको प्रहरी स्रोतले सञ्चारमाध्यमलाई जानकारी गरायो ।

काठमाडौंमा १५ किलो सुनसहित हतियार फेला पारेको र आफूहरु परीक्षणको क्रममा रहेको प्रहरी स्रोतले जानकारी गराएपछि सञ्चारमाध्यममा उक्त समाचार प्रकाशित र प्रशारण भयो । तर महानगरीय प्रहरी परिसरले दिउँसो गरेको पत्रकार सम्मेलनमा आधा किलो मात्रै सुन रहेका बाँकी साढे १४ किलो सुनको जलप लगाइएको चाँदीमात्रै थियो ।

काठमाडौंको व्यस्त सडकमा रहेको गाडी पनि फेला नपर्नु, पहिले सुन भनिएको वस्तु चाँदी भएको भन्दै पत्रकार सम्मेलन गरिएपछि प्रहरीको नेतृत्वसम्मले यो विषयमा चासो देखायो । घटना केही शंकास्पद रहेको भन्दै प्रहरीले बुधबार छानबिन समिति पनि बनाएको छ ।

समयमै भएन अरु प्रहरीलाई खबर

प्रहरीले गाडी बा ६ च ५५१९ नम्बरको स्कोर्पियो भएको बताएको छ । बिहान ८ बजे घटना भएको भनिए पनि ट्राफिक प्रहरीलाई ९ बजेमात्रै गाडीबारे जानकारी गराइयो ।  एकघण्टासम्म त्यो गाडी कहाँ पुग्यो भन्नेबारेमा चासो र सोधिखोजी भएन । प्रहरीका एक उच्च अधिकारीका अनुसार यहाँनेर शंका गर्नुपर्ने ठाउँ के छ भने प्रहरीले पत्रकार सम्मेलनमा भनेको गाडी नम्बर र ट्राफिक प्रहरीलाई टिपाएको गाडी नम्बर फरक छ ।

प्रहरी परिसरले महानगरीय ट्राफिक महाशाखालाई टिपाएको नम्बर थियो–बा ६ च ५५११ । एकघण्टापछि टिपाइएको गाडीको ‘लोकेसन’ ट्राफिकले पत्ता लगाउन सकेन ।

ट्राफिक प्रहरीका एक अधिकारीले बाह्रखरीसँगको कुराकानीमा भने, “समयमै खबर भएको भए ५ मिनेटमै गाडी नियन्त्रणमा आउन सक्थ्यो । हामीले सो क्षेत्रमा ५ मिनेटमात्रै गाडी होल्ड गरेको भए गाडी रोकिन्थ्यो । भाग्न पाउँदैनथ्यो । तर खबरै एकघण्टा ढिलोगरि आयो । खबरै ढिला भएपछि हामीले के गर्न सक्छौं र ?”

गाडी नम्बर किन फरक पर्‍यो वा हतारमा टिपाउँदा फरक पर्‍यो भन्नेबारेमा परिसरका प्रहरी मौन छन् । अर्कोतिर महानगरीय अपराध महाशाखालाई पनि घटनाबारे जानकारी दिइएन । जघन्य प्रकारका घटनामा महाशाखाको पनि सहयोग लिने गरिन्छ । महानगरीय प्रहरी कार्यालयबाट सेटमा जानकारी गराउने हो भने एकैचोटी उपत्यकाका सबै युनिटमा त्यो खबर प्रेषित हुन्छ तर त्यसो पनि गरेको नदेखिएको एकजना उच्च प्रहरी अधिकृत बताउँछन् ।

को थिए त गाडीमा ?

आखिर त्यो गाडीमा को थिए त ? उनीहरुको योजना के थियो ? प्रहरीले बरामद गरेका हतियार अत्यधुनिक प्रकृतिका रहेका छन् । उनीहरुको लुटपाटकै योजना देखिए पनि त्यो गाडीमा उनीहरुले फालेको धातु र पेस्तोलमात्रै थियो कि अरु केही पनि यसबारे प्रहरीभित्रै हल्लीखल्ली छ ।

एक प्रहरी अधिकारीका अनुसार गाडीमा चारजना थिए । प्रहरीले पत्रकार सम्मेलनमार्फत सार्वजनिक गरेको बा ६ च ५५१९ नम्बरको गाडीमा हतियार र धातुबाहेक अरु केही थियो वा थिएन खुल्न सकेको छैन । तर सो गाडी एक महिलाको नाममा भएको प्रारम्भिक अनुसन्धानबाट खुलेको छ । तर त्यो गाडी उनैले प्रयोग गर्थिन् वा अरुले गर्थे खुलेको छैन ।

नक्कली नम्बरको आशंका

प्रहरीले चेकप्वाइन्ट राखेर कृष्ण पाउरोटी चोकमा जाँच गरिरहेको थियो । गाडी उम्कियो तर त्यसको खबर किन माथिल्लो निकाय र अन्य प्रहरी कार्यालयमा समयमै गरिएन ? महानगरीय प्रहरी परिसर काठमाडौंकै एक अधिकारीको भनाइलाई आधार मान्ने हो भने गाडीको पिछा गर्नेमा सादा पोशाकका प्रहरी मात्रै थिए ।

सादा पोशाकमै रहेका प्रहरीले त्यो गाडीलाई कृष्ण पाउरोटी चोक नजिकै रोक्न खोजेका थिए । तर गाडी रोकिएन । केही अघि पुगेपछि गाडीभित्रबाट झोला बाहिर फालियो । त्यसपछि गाडीको पिछा गरेको नपाइएको प्रहरीकै उच्च अधिकारी बताउँछन् । त्यहाँ भनिएको गाडी नम्बर सही हो या नक्कली भन्ने खुल्न सकेको छैन । प्रायःजसो अपराधका घटनामा गाडीमा नक्कली नम्बरको प्रयोग गरिने भएकाले यो घटनामा पनि प्रहरीले भनेको नम्बर नक्कली हो कि भन्ने आशंका छ ।

टेकुबाट गायब भयो गाडी !

एक अधिकारीका अनुसार सो बा ६ च ५५१९ नम्बरको गाडी टेकुबाट गायब भएको पाइएको छ ।  कृष्ण पाउरोटीबाट टेकुसम्म पुग्दा पनि गाडीबारे किन खबर भएन ? प्रहरी अधिकारी घटनाबारे स्पष्ट बोल्न खोज्दैनन् । महानगरीय प्रहरी कार्यालय रानीपोखरीका प्रवक्ता एसएसपी सुनिलकुमार यादव घटनाको अनुसन्धान जारी रहेको बताउँछन् । 

उनले भने,“छिट्टै केही आउला । अनुसन्धान हुँदैछ । प्रहरीले नै हेर्दैछ ।”

गाडी नै नभेटिन सक्छ !

प्रहरीकै एक अधिकारीका अनुसार प्रहरीले दाबी गरेको त्यो गाडी नै नभेटिन पनि सक्छ । 

समयमै उनीहरुलाई नियन्त्रणमा लिन नसक्दा गाडी भेट्न मुस्किल पर्न सक्छ । ती अधिकारी भन्छन्,“गाडीमा वास्तविक नम्बर नभएको रहेछ वा रहेछ भने पनि गाडी भेट्न मुस्किल पर्न सक्छ । किनभने गाडी ग्यारेजमा हालेर सबै पुर्जा खोलेर यत्रतत्र हुन सक्ने सम्भावना छ । त्यसैले यो घटनाको रहस्य सजिलै बाहिर आउने सम्भावना कम छ ।”

काठमाडौंजस्तो सुरक्षा संवेदनशिलता भएको स्थानमा भएको यो घटनाले कयौं आशंका जन्माएको छ ।

छानबिन समिति गठन

महानगरीय प्रहरी कार्यालय रानीपोखरीले महानगरीय अपराध महाशाखाका एसएसपी दीपक थापाको नेतृत्वमा छानबिन समिति गठन गरेको छ । समितिमा एसएसपी किरण बज्राचार्य, एसपी सोमेन्द्रसिंह राठौर, एसपी दुर्गा दाहाल र डीएसपी राजकुमार केसी छन् ।