काठमाडौं । बुधबार काठमाडौंको कुमारी हलमा पछिल्लो समय हलमा आइरहेका चलचित्र भन्दा केही अलग धारमा बनेको चलचित्र ‘द स्पन्सर’ को विशेष प्रिमियर शो सम्पन्न भयो । ‘द स्पन्सर’ लाई प्रणय लिम्बूले निर्देशन गरेका हुन् भने रुद्रबहादुर गुरुङले निर्माण गरेका हुन् ।

पछिल्लो समय कमेडी, लभ, रोमान्स आदि जानरामा चलचित्रहरु बनिरहेका छन् । तर ‘द स्पन्सर’ हेरेपछि दर्शकले केही अलग चलचित्र हेर्न पाएकोमा आनन्दित महसुस भएको र चलचित्र निर्माण सिल्पको तारिफ गरेकोमा निर्देशक लिम्बू उत्साहित छन् ।

डेढ महिनापछि चलचित्र आम दर्शकका लागि हलमै रिलिज गर्ने सोचमा रहेका निर्देशक लिम्बू चलचित्र बुझ्ने एक समूहबाट राम्रो प्रतिक्रिया पाए पनि केही डरमा छन् । “एक प्याटर्नको मात्रै चलचित्र हेरिरहेका हाम्रा नेपाली दर्शकका लागि यस्तो चलचित्र हेर्न बानी छैन । यही कारण उहाँहरुले त्यति नरुचाइदिने हो कि भन्ने डर छ,” उनले भने ।  

चलचित्र काठमाडौंका मल्टिप्लेक्समा रिलिज गर्ने र त्यसपछि पाएको प्रतिक्रियाबाट मोफसल पनि जाने तयारी निर्माण टिमको छ । ‘द स्पन्सर’ सुनसरी र सप्तरीमा रहेका निम्नवर्गीय परिवारका छोराछोरीहलाई विदेशबाट स्पन्सरको रुपमा आउने केही सहयोगको बारेमा रहेको छ ।

निर्देशक लिम्बूले यो चलचित्र सहयोगका नाममा गरिबको नाममा गरिबको भावना र त्यहाँको सामाजिक भाष्यमाथि खेल्ने, गरिबी र जोखिममा रहेका कौशिकी जस्ताहरुलाई संरक्षण गर्ने केही एनजीओहरुलाई र सहरी मध्यवर्गीय सोच माथि चोटिलो व्यंग्य भएको बताए । “मलाई थाहा छ यो चलचित्र हलमा रिलिज गरेर हामीले रिस्क लिइरहेका छौं । दर्शकलाई यस्ता चलचित्रको महत्व बुझाउन समय लाग्ने छ । तर पैसा कमाउने भन्दा पनि दर्शकलाई अफ ट्रयाकका चलचित्रतर्फ पनि आकर्षित गर्र्नु हाम्रो उद्देश्य हो ।”