काठमाडौं । रामेछाप डुकु घर भई काठमाडौंको मनोहरामा बस्दै आएका २१ वर्षीय निरज अधिकारी लागुऔषध कारोबार गरेको अभियागमा दुईवर्ष जेल सजाय भोगेर गत असोजमा छुटेका थिए । 
अधिकारी गत शुक्रबार काठमाडौंको कोटेश्वरबाट फेरि पक्राउ परे । 
२ सय ४६ सेट लागुऔषध डाईजेपाम, फेनारगन र वुर्नफिनसहित पक्राउ परेका अधिकारी यही कारोबार गरेकै कारण दुईवर्ष जेल सजाय भुक्तान गरी निस्केको २ महिना नवित्दै पुनः पक्राउ परेका हुन् ।
हुनत अधिकारी मात्र हैन, यसअघि उनका दिदी र दाजुले पनि लागुऔषध कारोबार गरेको अभियोगमा जेल सजाय भुक्तान गरिसकेका छन् । 
परिवारमा तीन जनालाई प्रहरीले लागुऔषध कारोबार गरेको अभियोगमा पक्राउ गरेपछि उनका बाबुआमाले कोटेश्वरमा रातको समयमा ठेलामा चिया बेन्ने काम गर्ने गरेको प्रहरीको भनाई छ । 
२ वर्ष जेल सजाय पाएर पनि अधिकारी पुनः किन त्यही पेशामा लागे त ? लागु औषध नियन्त्रण ब्यूरोका डीएसपी अपिल बोहोरा भन्छन्, “उनी धेरै पढेलेखेका पनि छैनन् । तर पनि उसलाई हेर्दा धेरै पढेलेखेको र राम्रो काम गर्नेरहेछ भन्ने लाग्छ । लागुऔषधका होलसेलर व्यापारी नै रहेछ । त्यसैले पनि सुध्रिन सकेन ।”
लागुऔषधको कारोबार गर्ने कैयौं जेल बसेर छुटेपछि अधिकारी जस्तै पुनः उही कारोबारमा फर्किन्छन् । २ वर्ष जेल सजाय भुक्तान गरी पुनः पक्राउ परेका अधिकारीले कम लगानीमा धेरै मुनाफा हुने भएका कारण लागुऔषध बेच्ने गरेको बयान दिएका छन् । 
“५ सयमा किनेर १२ सयमा बेच्न सकिन्छ,” अधिकारीले दिएको बयान उद्धृत गर्दै प्रहरीले भन्यो, “ कहिलेकाँही १५ सयमा पनि विक्रि गर्न सकिन्छ, मलाई यो व्यापार फाप्यो, त्यसैले छाड्न सकिनँ । तर फसेँ ।”
अधिकारी ४–५ वर्ष यता देखि लागुऔषध विक्रिवितरण गर्ने गरेको प्रहरी अनुसन्धानबाट खुलेको छ । अधिकारीलाई ब्यूरोले हिरासतमा राखि थप अनुसन्धान अघि बढाएको छ ।