काठमाडौं । नेपाल निर्माण व्यवसायी महासंघले कानुन, न्याय तथा संसदीय मामिला मन्त्री अजयशंकर नायकसँग विभिन्न माग राख्दै ज्ञापन पत्र बुझाएको छ । महासंघका अध्यक्ष शरदकुमार गौचन नेतृत्वमा आएको टोलीले बिहीबार मन्त्री नायक समक्ष महासंघले निर्माण आयोजनाहरुको म्याद १ वर्ष थप गर्नुपर्ने, सार्वजनिक खरिद नियमावली, २०६४ को संशोधनका लागि पहल गर्नुपर्ने, मूल्य समायोजन तथा क्षतिपूर्तिको व्यवस्थाका लागि आवश्यक पहल गर्नुपर्ने लगायतका माग राखेको हो ।  

महासंघले मन्त्री नायकलाई विकासका कामलाई द्रुत गतीमा अघि बढाउन स्वायत्त र गतिशील निर्माण बोर्डको गठनका लागि निर्माण व्यवसाय विकास परिषद्मार्फत पहल गरिदिन र आयोजनाहरुमा आवश्यक सुरक्षाका लागि पहल गरिदिन आग्रह गरेको मन्त्री नायकका प्रेस सल्लाहाकार बुद्ध लोप्चनले बताए । 

जवाफमा मन्त्री नायकले महासंघको मागप्रति सरकार सकारात्मक रहेको भन्दै भने, “तपाईहरुको माग सम्बोधनका लागि सरकार सकारात्मक छ, साझा माग सम्बोधनका निम्ति म आफ्नोतर्फबाट पहल गर्छु ।”