राजनीति
काठमाडौं । सरकारले कात्तिक मसान्तभित्र संसद्मा संविधान संशोधन प्रस्ताव दर्ता नगराए संघीय गठबन्धनले मंसिर पहिलो सातादेखि आन्दोलन गर्ने निर्णय गरेको छ । बिहीबार संघीय समाजवादी फोरमको कार्यालयमा बसेको बैठकले संशोधन प्रस्ताव दर्ता नभए मंसिर पहिलो सातादेखि आन्दोलन गर्ने निर्णय गरेको राष्ट्रिय मधेस समाजवादी पार्टीका प्रवक्ता केशव झाले जानकारी दिए ।
बैठकमा सरकारले संविधान संशोधन प्रस्ताव दर्ता गर्न आलटाल गरेपछि गठबन्धनका नेताहरुले फेरि आन्दोलनमा जानुपर्ने धारणा राखेको झाले बताए । “प्रधानमन्त्रीले सुरुमा कात्तिक २५ गते भित्र संशोधन प्रस्ताव दर्ता गर्ने आश्वासन दिएका थिए । पछि कात्तिक मसान्तको समय मागे र अहिले सो समयभित्र पनि संशोधन प्रस्ताव दर्ता गर्न कुनै चासो नदेखाएपछि आन्दोनलको तयारीका लागि बैठकमा छलफल भएको छ ।” बाह्रखरीसँग कुरा गर्दै प्रवक्ता झाले भने, “संविधान संशोधन सम्बन्धी प्रस्ताव दर्ता नभए मंसिर पहिलो सातादेखि काठमाडौंमा धर्ना बस्ने निर्णय भएको छ ।”
गठबन्धनको बैठकमा उपस्थित नहुने गरेका सद्भावना अध्यक्ष राजेन्द्र महतो भने बिहीबारको बैठकमा पनि आएका थिएनन् । महतो बाहेक मधेसी मोर्चाका अधिकांश दलका अध्यक्षहरु बैठकमा सहभागि थिए ।
प्रकाशित मिति: बिहीबार, कात्तिक २५, २०७३ १८:००
प्रतिक्रिया दिनुहोस्