राजनीति
काठमाडौं । भारतको सिको गर्दै आगामी नोभेम्बरमा पाकिस्तानको इस्लामावादमा हुन गइरहेको दक्षिण एसियाली क्षेत्रीय सहयोग संगठन (सार्क)को सम्मेलन बंगलादेश, भुटान र अफगानिस्तानले पनि वहिष्कार गरेको स्रोतहरूलाई उद्धृत गर्दै भारतीय समाचार संस्था दि टाइम्स अफ इन्डियाले जनाएको छ ।
इस्लामावादमा हुन लागेको सार्कको १९ औं सम्मेलनमा भाग नलिने भन्दै ती राष्ट्रहरूले सार्कको वर्तमान अध्यक्ष नेपाललाई यस विषयमा छुट्टाछुट्टै पत्र पठाएको टाइम्स अफ इन्डियाले लेखेको छ ।
बंगलादेशले उसको आन्तरिक मामिलामा पाकिस्तानले हस्तक्षेप बढाउँदै लगेको भन्दै यस अवस्थामा सार्क बैठक सफल हुन नसक्ने बताएको छ ।
भुटानले पनि सार्कको प्रगतिप्रति आफू प्रतिबद्ध रहेको तर यस क्षेत्रमा पछिल्लो समय बढेको आतंकवादले सार्क सम्मेलन सफल हुनेमा आशंका उब्जिएको बताएको छ ।
त्यस्तै, अफगानिस्तानले पनि आफू सम्मेलनमा सहभागी नहुने ब्यहोराको पत्र नेपाललाई पठाएको बताइएको छ । उता श्रीलंकाले पनि भारतको अनुपस्थितिमा सार्क सम्मेलन हुन नसक्ने बताएको टाइम्स अफ इन्डियाले जनाएको छ ।
यसअघि भारतले वर्तमान अवस्थामा इस्लामावादमा प्रस्तावित शिखर बैठकमा भाग लिन असमर्थ रहेको जनाएको थियो । इस्लामावादमा आगामी नोभेम्बर ९ र १० का दिन १९ औं सार्क शिखर सम्मेलन हुने तय थियो ।
सार्क बडापत्रमा कुनै एउटा राष्ट्र अनुपस्थित वा असहमत भएमा सम्मेलन वा कुनै निर्णय हुन नसक्ने प्रावधान छ ।
प्रकाशित मिति: बुधबार, असोज १२, २०७३ १२:३६
प्रतिक्रिया दिनुहोस्