इनरुवा, १ असोज । सुनसरीको प्रकाशपुर गाविस–५ राजावासस्थित सप्तकोसी नदीमा शनिबार दिउँसो डुङ्गा डुबेको छ ।
सप्तकोसी नदीको बीचभागमा पर्ने श्रीलङ्का टापूबाट यात्रु लिएर प्रकाशपुरतर्फ आउँदै गरेको डुङ्गा डुबेको प्रहरीले जनाएको छ । चिलैयाघाटबाट प्रकाशपुरतर्फ हिँडेको डुङ्गा नदीको बीचभागमा डुब्दा ३७ जनाको जीवितै उद्धार गरिएको छ ।
दाउरा खोज्न नदीमा गएका अर्को डुङ्गामा रहेका केही युवाको सहयोगमा २३ जनाको उद्धार सम्भव भएको थियो । डुङ्गा डुबेको खबर पाएसँगै पुगेको नेपाल प्रहरी, सशस्त्र र नेपाली सेनाको टोलीले थपको उद्धार गरेको थियो । डुङ्गामा कति यात्रु सवार थिए भन्ने साँझसम्म पनि यकिन हुन नसक्दा कोसी नदीमा हराएकाहरुको पूर्ण विवरण भने प्राप्त हुन नसकेको सुनसरीका प्रहरी नायब निरीक्षक विनोद घिमिरेले जानकारी दिए ।
सुनसरी प्रशासनले आठजना बेपत्ता भएको हुनसक्ने अनुमान गरे पनि डुङ्गा दुर्घटनामा परी उद्धारमा परेकाहरुले ६० जनाभन्दा बढी यात्रु सवार रहेको र कम्तीमा १५ जना बेपत्ता हुन सक्ने बताएका छन् । आफू पानीमा डुबेर पनि छ महिने काखे छोरीलाई बचाएको दुर्घटनामा परेकी महिला दुर्गा कविरथले बताइन् । कोसी क्षेत्रमा दिउँसोबाटै भारी वर्षा भएपछि उद्धारमा कठिनाइ भएको छ । हराएकाको खोजीका लागि कोसी ब्यारेजसहित नदी किनारमा सुरक्षाकर्मी परिचालन गरिएको सुनसरीका प्रजिअ मोहन चापागार्इंले जानकारी दिए । श्रीलङ्का टापूबाट डुङ्गा चढी हिँडेकाहरु प्रकाशपुरमा लाग्ने हटियाका लागि आएका थिए । गत वर्षसमेत कोसी नदीमा डुङ्गा दुर्घटना हुँदा पाँचजना बेपत्ता भएका थियो । रासस
