देश
काठमाडौं । अमेरिकाको खोजी सुचीमा रहेका र नेपालमा बाल यौन दूराचारीको आरोपमा पक्राउ परेका अमेरिकी नागरिक केन्नेथ जोसेफ कोम्बसको विरुद्ध पुनः दुई जना बालकले उजरी दर्ता गरेका छन् । हालसम्म उनको नाममा उजुरी गर्ने बालकको सङ्ख्या १० पुगेको छ । केन्नेथलाई प्रहरीको केन्द्रीय अनुसन्धान व्युरोले केही दिन अघि काठमाडौँको ठमेलबाट पाँच बालकसहित पक्राउ गरेको हो ।
आफूलाई एप्स डेभलपरको परिचय दिँदै पटक–पटक नेपाल आएका जोसेफ कोम्बसले दर्जनौं बालकलाई यौन शोषण गरेको हुन सक्ने प्रहरीको अनुमान छ ।
सीआईवीका प्रमुख डीआईजी नवराज सिलालले भने, “जोसेफ कोम्बस २०१४ को सेप्टेम्बरयता छ पटक नेपाल आइसकेका छन् । उनी अमेरिकी प्रहरीको आँखा छल्न नेपाल आएको हुनसक्छन्, नेपालमा पनि यसअघि पटक–पटक पक्राउ पर्दै आएका जोसेफ कोम्बस यौन दूराचारको ठूलै अपराधी भएको प्रहरी अनुमान छ ।
उनका अनुसार जोसेफ कोम्बस ११ देखि १४ वर्ष उमेरका पाँच जना बालकलाई यौन दूराचार गरेकै अवस्थामा परेका थिए । “प्रहरीले अनुसन्धान गर्दै जाँदा अहिले १० जना पुगेका छन्, उनीबाट पीडित बन्नेहरू अझै बढ्ने क्रम जारी छ,” डीआईजी सिलवालले थपे ।
यसरी बालकलाई जालोमा पार्थे जोसेफ कोम्बस
जोसेफ कोम्बस दिनहुँ काठमाडौंका विभिन्न स्थानमा घुम्थे, घुम्नेबेला उनले बाटोमा अभिभावकको रेकदेख नपाएको जस्तो बालक देख्ना साथ उनलाई हेलो हाई गर्दै नजिक हुन्थे । र, उनी ती बालकलाई नजिकको पसलमा गएको चक्लेट किनेर दिन्थे । बिस्तारै–बिस्तारै उनको परिवारका बारेमा जोसेफ कोम्बसले जानकारी लिन्थे । परिवारबाट वास्ता नहुने र दिनभरी जता गए पनि खोजी नगर्ने बालकलाई जम्मा पार्थे र होटलमा ल्याउँथे ।
अनुसन्धान अधिकारीका अनुसार कुनै कुनै बालकका अभिभावकलाई विश्वास दिलाएर पठन पाठनका सामग्री दिने र नजिक भएर बालकलाई आफ्नो जालोमा पार्थे । नेपाली भाषा नजान्ने भएका कारण उनले काभ्रेका बुद्ध पुतवारलाई सहयोगी बनाएका थिए । प्रहरीका अनुसार ती सहयोगीले विभिन्न स्थानमा पुगेर बालकहरुलाई पैसा दिन्छु, काममा लगाइदिन्छु, पढाउँछु भन्ने जस्ता प्रलोभन देखाएर जोसेफ कोम्बसको जिम्मा लगाउने गर्दथे ।
उनका बारेमा विस्तृत अनुसन्धान भइरहेको प्रहरीले जानकारी दिएको छ ।
तस्बिर केन्नथेको फेसबुकबाट
प्रकाशित मिति: बुधबार, भदौ २९, २०७३ १६:१६
प्रतिक्रिया दिनुहोस्