काठमाडौं । मेगा बैंक र नेपाल इन्भेस्टमेन्ट बैंक मर्जरमा जाने भएका छन् । शुक्रबार दुवै बैंकले स्वाप रेसीयो १००ः९० को अनुपातमा मर्जरमा जाने सम्झौता गरेको मेगा बैंकका अध्यक्ष भोजबहादुर शाहले जानकारी दिए ।
"नेपाल इन्भेस्टमेन्ट मेगा बैंकको नाम राख्ने र स्वाप रेसियो मेगाको ९० र इन्भेस्टमेन्टको १०० अनुपातमा मर्जर सम्झौतामा हस्ताक्षर भयो," अध्यक्ष शाहले भने ।
शुक्रबार राजधानीको एक होटलमा आयोजित कार्यक्रमबीच दुवै बैंकका अध्यक्षले मर्जर सम्झौतामा हस्ताक्षर भएको हो ।
मर्जरपछि बन्ने बैंकको प्रमुख कार्यकारी अधिकृत (सीईओ) ज्योतिप्रकाश पाण्डे, अध्यक्षमा पृथ्वीबहादुर पाण्डे र नायव प्रमुख कार्यकारी अधिकृतमा रविना देशराज जोशी रहनेगरी सम्झौता भएको छ ।
हाल इन्भेस्टमेन्ट बैंकको चुक्ता पुँजी १८ अर्ब ३० करोड रुपैयाँ र मेगा बैंकको १६ अर्ब १२ करोड रुपैयाँ छ । मर्जरपछि बन्ने बैंकको कुल निक्षेप संकलन तीन खर्ब २७ अर्ब र कर्जा लगानी ३ खर्ब १२ अर्ब पुग्ने छ ।