काठमाडौं । पर्सामा युवकको हत्यामा संलग्न रही फरार रहेको आरोपमा तीनजना पक्राउ परेका छन् । ठोरी गाउँपालिका–५, ठूलो बाघमोर्चा बस्ने २३ वर्षीय प्रविण पाख्रिनको हत्यामा संलग्न रही फरार रहेको आरोपमा उनीहरूलाई प्रहरीले पक्राउ गरेको हो ।

पक्राउ पर्नेहरूमा ठूलो बाघमोर्चाका २२ वर्षीय सरोज स्याङ्वो, पर्साको वीरगन्ज महानगरपालिका–३२, रामवनका २० वर्षीय किशन लोप्चन र १७ वर्षीय किशोर रहेका छन् ।

ठूलो बाघमोर्चा मन्दिरको छेउमा प्रविणलाई यही जेठ ६ गते दिउँसो अज्ञात व्यक्तिहरूले ढुंगाले टाउको र अनुहारमा प्रहार गरी बेहोस अवस्थामा छाडी फरार भएका थिए । वीरगन्जस्थित एलएस न्युरो हस्पिटलमा उपचारका क्रममा उनको मृत्यु भएको थियो ।

उनीहरूलाई काठमाडौं महानगरपालिका–३, महाराजगन्जबाट पक्राउ गरिएको प्रहरीले जनाएको छ ।