दाङ । उच्च अदालत तुलसीपुरले कोरोना संक्रमणकाे खाेखिम कम गर्न आवश्यक व्यवस्था गर्न सरकारका नाममा आदेश जारी गरेको छ । बिहीबार कोभिडविरुद्धको खोपको व्यवस्था गर्न तथा स्वाब संकलनको दायरा बढाउन भनी अदालतले सरकारका नाममा अन्तरिम आदेश जारी गरेको हो । 
अदालतले औषधि र अक्सिजनको आपूर्ति सहज बनाउन, स्वाब संकलन र पीसीआर परीक्षणको दायरालाई ब्यापक बिस्तार गर्न, सुबिधा सम्पन्न क्वारेन्टिन, आईसीयू, भेन्टिलेटरको उपयुक्त व्यवस्थापन गर्न÷गराउन भनी आदेश गरेको छ । 

अदालतको आदेशमा हालसम्म कोरोना विरुद्धको खोप कति जनालाई दिएको छ र हालसम्म पीसीआर जाँच कति भए, स्वाब संकलन केन्द्र कति रहेका छन् जस्ता प्रश्नको लिखित जवाफ पेश गर्न भनिएको छ  ।

मुख्यन्यायाधीश निता गौतम दीक्षितको एकल इजलासले तुलसीपुर उपमहानगरपालिका, घोराही उपमहानगपालिका, लमही नगरपालिका, जिल्ला प्रशासन कार्यालय दाङ, स्वास्थ्य कार्यालय दाङ, जिल्ला कोभिड–१९ संकट ब्यबस्थापन संचालन केन्द्र, जिल्ला विपत्त व्यव्यस्थापन र लुम्बिनी प्रदेश सरकारबाट स्थापना गरिएको कोरोना भाइरस नियन्त्रण तथा कोषबाट हालसम्म दाङ जिल्लामा भए गरेका कामकारबाहीको विवरण संलग्न गरी जेठ ९ गतेभित्र लिखित जवाफ पेश भनेको छ ।

अधिवक्ताहरू विष्णुमणी धिताल, रबिन्द्रकुमार धिताल, मधुसुदन गौतम, नागरिक अगुवा तथा पत्रकार सुशील बस्नेत र टेकनाथ आचार्यले उच्च अदालत तुलसीपुरमा रिट निवेदन दायर गरेका थिए ।