काठमाडौं । साताको अन्तिम कारोबार दिन बिहिबार सेयर बजार परिसूचक नेप्से दोहोरो अंकले बढ्दा २७०० अंकको विन्दुनजिक पुगेको छ । बिहीबार २६७३.८८ अंकमा बन्द भएको नेप्से बिहीबार १०.१३ अंकले वृद्धि हुँदा २६८४.०१ अंकमा बन्द भएको छ ।

‘प्रि–ओपन’ सेसनमा नै २५ अंकले वृद्धि भएर २७०१.९२ अंकमा खुलेको नेप्से ‘इन्ट्रा–डे’ कारोबारमा २७०२.७४ अंकसम्म पुगेर २६७९.०३ अंकसम्म झरेको थियो । नेप्सेसँगैँ ‘क’ वर्गका कम्पनीलाई मापन गर्ने सेन्टिभ इन्डेक्स पनि १.१२ अंकले बढेर ४७९.५० अंकमा बन्द भएको छ ।

व्यापार होटेल तथा पर्यटन, उत्पादनमूलक र लगानी उपसूचकमा गिरावट हुँदा बजारलाई लिड गर्ने बैंकिङ उपसूचक ०.१८ प्रतिशतले बढेको छ । यस्तै, वित्त कम्पनी उपसूचक सर्वाधिक ४.६८ प्रतिशतले वृद्धि हुँदा विकास बैंक उपसूचक २.५१ प्रतिशत र हाइड्रोपावर उपसूचक १.४१ प्रतिशतले बढेको छ । व्यापार र होटेल तथा पर्यटन उपसूचक भने समा ०.६ प्रतिशतले घटेको छ ।

बजार परिसूचकसँगै कारोबार रकम पनि बढेर ७ अर्ब नाघेको छ । आज नेप्सेमा २ करोड १९ लाख ५५ हजार ९४३ कित्ता सेयर किनबेच हुँदा ७ अर्ब १२ करोड ६८ लाख ८५ हजारको कारोबार भएको छ ।

आज कारोबार रकममा नेपाल पुनर्बिमा कम्पनीले लिड गरेको छ । कम्पनीको सर्वाधिक ४९ करोड ४ लाख ७६ हजारको कारोबार हुँदा नेसनल हाइड्रोपावरको २५ करोड ६७ लाख १० हजार र अरुण काबेली पावरको २१ करोड ६० लाख २० हजारको कारोबार भएको छ ।

आज नेप्सेमा १२ कम्पनीको सेयर मूल्यमा सकारात्मक सर्किट लागेको छ । सेयर कारोबारीहरु कमजोर फन्डामेन्टल भएका सस्ता हाइड्रोपावरसहित वित्त कम्पनीको पछि लाग्दा केही दिनयता त्यस्ता कम्पनीको सेयर मूल्यमा लगातार सकारात्मक सर्किट लागेको छ ।

आज सकारात्मक सर्किट लाग्नेमा दिव्येश्वरी हाइड्रोपावर, समता, घरेलु लघुवित्त, विशालबजार कम्पनी, रुरु जलविद्युत् कम्पनी, सांग्रिला डेभलपमेन्ट बैंक, प्रोग्रेसिभ फाइनान्स र जोशी हाइड्रोपावर छन् । त्यस्तै, समृद्धि फाइनान्स, आँखुखोला जलविद्युत् कम्पनी, खालीखोला हाइड्रोपावर, वेस्ट फाइनान्स र सेन्ट्रल फाइनान्सको सेयर मूल्यमा पनि सकारात्मक सर्किट लागेको छ । यता, रिडी हाइड्रोपावरको सेयर मूल्य २.०९ प्रतिशतले घट्दा राष्ट्रिय बिमा कम्पनीको सेयर मूल्य १.९९ प्रतिशतले घटेको छ ।

आज कारोबारमा आएका ११२ कम्पनीको सेयर मूल्य बढ्दा ५८ कम्पनीको  सेयर मूल्य घटेको छ । १४ कम्पनीको सेयर मूल्य  भने स्थिर रह्यो ।