काठमाडौँ । सत्तारूढ नेपाल कम्युनिस्ट पार्टी (एमाले)का नेता सुरेन्द्र पाण्डेले कारबाही फिर्ता सकारात्मक भएको प्रतिक्रिया दिएका छन् । उनले कारबाहीको औचित्य पुष्टि गर्न नसकेर फिर्ता लिएकाले सकारात्मक मान्नुपर्ने बताउँदै पार्टीको विवाद मिलाउने हो भने २०७५ जेठ २ मा निशर्त फर्कनुपर्ने बताए ।

“हामीले कारबाही फिर्ता गलत भनेर हिजै भनेका थियौँ । आज फिर्ता लिएपछि सकारात्मक नै मान्नुपर्‍यो,” उनले बाह्रखरीसँग भने, “पार्टी एकताको प्रस्थान विन्दु २०७५ जेठ २ नै हो । त्यसमा फर्किएमात्रै एकताको सम्भावना हुन्छ ।”

उनले देशभरका कार्यकर्ताको माग पार्टी एकता नै भएकाले ओलीलाई जेठ २ मा फर्कन आग्रह गरे ।

“कारबाहीको त कुनै औचित्य थिएन । फिर्ताले मात्रै जोड्न सक्दैन, अब जेठ २ मा फर्किऔँ,” उनले थपे । 

विवाद उत्कर्षमा पुगेका बेला प्रधानमन्त्री केपी ओली र नेता माधवकुमार नेपालबीच आजै भेटवार्ता हुँदैछ । भेटवार्तामा एकता कि राजीनामा निरूपण हुने नेता युवराज ज्ञवालीले जानकारी दिए ।