काठमाडौं । सत्तारूढ नेपाल कम्युनिस्ट पार्टी (एमाले)भित्रको विग्रह उत्कर्षभित्र अभिमुख भएको बेला नेताहरूबीच संवाद तीव्र हुन थालेको छ ।
आज बिहान नेता माधवकुमार नेपाल र अर्थमन्त्री तथा संगठन विभाग प्रमुख विष्णु पौडेलबीच कोटेश्वरमा करिब २० मिनेट कुराकानी भएको छ । नेता नेपाल र पौडेलबीचको संवाद एमाले संसदीय दलका नेता सुवास नेम्वाङले पुष्टि गरे ।
नेता नेपाल भेट्न अर्थमन्त्री पौडेल निजी गाडीमा बिहीबार बिहान ८ः४५ बजेतिर कोटेरश्वर पुगेको स्रोतको दाबी छ । नेपाल–पौडेल संवादमा सोम पाण्डे पनि साक्षी थिए ।
नेता नेपाललाई भेट्न पौडेललाई कोटेश्वर पठाएका प्रधानमन्त्री तथा पार्टी अध्यक्ष केपी शर्मा ओलीले बिहान ९ बजे स्थायी कमिटीको बैठक बोलाए । भेटमा पौडेलले राजीनामाको निचोड त्यागेर सहमतिको मिलनविन्दुको खोजी गर्न आग्रह गरेको स्रोतले जानकारी दियो ।
“उही पुरानै प्रस्ताव छन् । फागुन २८ को निर्णय मान्य हुनेगरी कुनै मिलनविन्दु खोजौँ भन्ने छ, मूर्त प्रस्ताव छैन,” स्रोतले भन्यो ।
स्थायी कमिटी बैठकले खनाल–नेपाल पक्षसँग सहमतिका लागि सार्थक प्रयास गर्नेबारे निर्णय लिने बताइएको छ । सम्भावित निर्णय के हुने भन्नेबारे स्रोतले खुलाउन चाहेन ।
यता, संसद्मा प्रधानमन्त्री ओलीले विश्वास गुमाएपछि राष्ट्रपति विद्यादेवी भण्डारीले सरकार गठनका लागि दिएको तीनदिने समयसीमा आज राति ९ बजे सकिँदै छ । खनाल–नेपाल समूह राजीनामापत्र तयार पारेर बसेको छ । यद्यपि त्यहाँ पनि राजीनामाबारे मत विभाजन छ ।
पार्टी फुटतर्फ अघि बढेपछि दोस्रो तहका नेताहरू अघि बढेर मध्यमार्गी विन्दु पहिल्याउन जोड दिइरहेका छन् ।