बीबीसी । इन्डियन प्रिमियर लिग (आईपीएल) अनिश्चितकालका लागि स्थिगित भएको छ । गएको मंगलबारबाट आईपीएल स्थगित भएको हो ।
खेलाडी र टिम अफिसियलमा कोरोना संक्रमण देखिएपछि प्रतियोगिता स्थगित गरियो । त्यसको मारमा भने अष्ट्रेलियन खेलाडी परेका छन् । अष्ट्रेलियाले मे १५ सम्म सबै बोर्डर र हवाई उडान बन्द गरेको छ । खेलाडीहरु घर कसरी फकने भन्ने चिन्तामा छन् ।
यस्तो अवस्थामा अष्ट्रेलियन खेलाडीले केही दिन श्रीलंका वा माल्दिभ्समा समय बिताउने योजना बनाएका छन् । यदि, अष्ट्रेलिया सरकारले ३८ खेलाडीहरुलाई घर फर्कन अनुमति दिएको खण्डमा बोर्ड अफ कन्ट्रोल फर क्रिकेट इन्डिया (बीसीसीआई)ले चार्टर फ्लाइटको व्यवस्था गर्ने जनाएको छ ।
आईपीएलमा सहभागी अष्ट्रेलियन ब्याटिङ प्रशिक्षक मिके हुसे हाल कोरोना संक्रमित छन् । कोरोना संक्रमण देखिने उनी पहिलो अष्ट्रेलियन प्रशिक्षक हुन् । हुसे १० दिनको क्वारेन्टिनमा छन् । “उनको अवस्था अहिले केही सामान्य छ । उनले भारतमा राम्रो सहयोग पाएका छन्,” अष्ट्रेलियन क्रिकेटर टेन्ट ग्रेनबर्गले भनेका छन् ।
अब अष्ट्रेलियाका खेलाडी तथा प्रशिक्षकहरू घर फर्कनुभन्दा पहिले १४ दिनको क्वारिन्टिनमा बस्नुपर्नेछ । यसअघि, अष्ट्रेलिया सरकारले यस अवधिमा भारतबाट फर्कने सबैलाई जेल सजायसहित जरिवाना पनि गर्ने जनाएको थियो ।
क्रिकेट अस्ट्रेलियाका अन्तरिम प्रमुख कार्यकारी निक हकले सरकारबाट ‘कुनै खास किसिमको छुट’ नपाएको बताएका छन् । सरकारबाट कुनै किसिमको व्यवस्था हुन सक्ने विषयमा आफूहरू छलफलमा रहेको उनले बताए । खेलाडीहरूको विषयमा केही सोच्न लगाउने उनको भनाइ छ ।
अष्ट्रेलियाका तीन खेलाडी आदम जाम्पा, केन रिचर्डसन र आन्द्रे टेयले गएको अप्रिलमा नै प्रतियोगिताबाट नाम फिर्ता लिएका थिए ।
अष्ट्रेलियन पेस बलर प्याट कमिन्सले यात्रा प्रतिबन्धले खेलाडीहरुलाई असहज भएको बताए । “घर फर्कन प्रतिबन्ध गर्दा खेलाडीहरूलाई घर फर्कन असज भएको छ,” कमिन्सले भने ।
उनले थपे, “हामीले १४ दिनको क्वारेन्टिनमा बस्ने भन्ने कुरामा सम्झौता गर्न तयार थियौँ । तर, यसरी कडा रुपमा बोर्डर बन्द हुँदा राम्रो भने लागेन,” कमिन्सले भने । भारतमा बुधबार मात्र तीन लाख ५५ हजारजनामा कोरोना संक्रमणको देखिएको थियो ।
अब भने अष्ट्रेलियन खेलाडीले घर फर्कनभन्दा पहिले केही दिन क्वारेन्टिनमा बस्ने योजना बनाएका छन् । त्यसका लागि बीसीसीआईले सहजीकरण गर्ने योजना बनाएको छ । खेलाडीले भने माल्दिभ्स र श्रीलंकालाई आफ्नो क्वारेन्टिन स्थलका रुपमा रोजेका छन् ।
