काठमाडौं । नेकपा (माओवादी केन्द्र)ले पार्टी छाडेका सांसदहरुलाई मंगलबार कारबाही गर्‍यो । प्रधानमन्त्री केपी शर्मा ओली नेतृत्वमा मन्त्री रहेका प्रतिनिधिसभाका चार सांसदलाई कारबाही गरेको जानकारी मंगलबार संघीय संसद् सचिवालयलाई गरायो ।

माओवादीले मन्त्रीहरु लेखराज भट्ट, टोपबहादुर रायमाझी, गौरीशंकर चौधरी र प्रभु साहले पार्टी त्यागेको जानकारी गराएको हो । राष्ट्रियसभाका सांसद रामबहादुर थापा ‘बादल’ ओली नेतृत्वको सरकारमा गृहमन्त्री छन् । माओवादीले बादललाई कारबाही गरेको पत्र भने बुझाएको छैन । उनलाई कारबाही गर्ने निर्णय भइसकेको र एक–दुई दिनभित्रै संसद् सचिवालयलाई जानकारी गराउने सचेतक देव गुरुङले जानकारी दिए ।

“प्रतिनिधिसभा र राष्ट्रियसभालाई छुट्टै पत्र बुझाउनुपर्छ । प्रतिनिधिसभाका सांसदहरुलाई कारबाही गरेको पत्रचाहिँ बुझाइयो । प्रतिनिधिसभा चलिरहेको छ । राष्ट्रियसभा चलेको पनि छैन । सदन चलेका बेलामा अध्यक्षले सदनमा सुनाउनुपर्छ,” उनले भने ।

संसद् नचलेको अवस्थामा पार्टी परित्याग गरेको जानकारी सचिवालयमा दर्ता भएको १५ दिनभित्र सूचना पार्टीमा सूचना टाँस गर्ने कानुनी व्यवस्था पनि छ । “सोही कारण पत्र बुझाउन सदन चल्नुपर्छ भन्ने छैन । पार्टीले निर्णय गरिसकेको छ । एक–दुई दिनमा बुझाउँछौँ,” गुरुङले भने ।

हाल राष्ट्रियसभाको अधिवेशन चलेको छैन भने अध्यक्ष गणेशप्रसाद तिमिल्सिना पनि देशबाहिर छन् । त्यसकारण पत्र नबुझाइएको राष्ट्रियसभाका सदस्य रामनारायण बिडारीको भनाइ छ ।