काठमाडौं । घरेलु फुटबलमा यति बेला दुईवटा विषयको चर्चा भइरहेको छ । पहिलो चर्चा नेपालले ३७ वर्षपछि घरेलु भूमिमा उपाधि उचालेको र दोस्रो चर्चा सोही उपाधि भिडन्त हेर्न दशरथ रंगशाला पुगेका प्रधानमन्त्री केपी शर्मा ओलीको अगाडि खेलाडीहरूले लगाएको ‘केपी बा वी लभ यु’को नाराको ।
लामो समयपछि घरेलु मैदानमा उपाधि उचाल्दा खेलाडीको उत्साह अनुहारमै प्रष्टसँग झल्किन्थ्यो । अर्कोतिर, त्यही उत्साहका बीच खेलाडीको अनुहारमा १३ वर्ष राष्ट्रिय टोलीमा बिताएका विराज महर्जनको सन्यासले बनाएको निराशा पनि झल्किन्थ्यो । उनले बंगलादेशसँगको फाइल खेलपछि अन्तर्राष्ट्रिय फुटबलबाट सन्यासको घोषणा गरेका थिए ।
उपाधि आफ्नो पोल्टामा परेपछि उत्साहित बनेका खेलाडीहरूले प्रधानमन्त्री ओलीकै अगाडि ‘केपी बा वी लभ यु’को नारा लगाए । सोही नारा अहिले सर्वाधिक आलोचना र प्रोत्साहनको विषय बनेको छ । नेपाली फुटबल इतिहासमा फुटबल खेलाडीले कुनै प्रधानमन्त्रीको प्रशंसा गरेको सायदै यो पहिलो घटना हो ।
‘केपी बा वी लभ यु’को नारा
घरेलु मैदानमा कीर्गिस्तान, बंगलादेश र नेपालबीच त्रिदेशीय फुटबल चल्यो । नेपालले आफ्ना अघिल्ला दुई खेलमा बराबरी खेल्दै फाइनलमा स्थान बनाएको थियो । अर्कोतिर, बंगलादेश पनि फाइनल पुगेको थियो । फाइनल खेलमा नेपालले बंगलादेशलाई २–१ ले पराजित गर्दै उपाधि आफ्नो पोल्टामा पा¥यो ।
आफ्नो राजनीतिक व्यस्तताका बाबजुत फाइलन हेर्न दशरथ रंगशाला पुगेका प्रधानमन्त्री ओलीले खेलको अन्तिम मिनेटसम्म उत्सुकताका साथ हेरे । प्रधानमन्त्री नै आफूहरूको खेल हेर्न मैदानमा उपस्थित भएपछि खेलाडीहरूमा बेग्लै उत्साह देख्न सकिन्थ्यो ।
नेपालले उपाधि उचालीसकेपछि विराज महर्जनलाई ओलीले ‘ब्लेजर’ लगाएर बिदाइ गरे । महर्जनले आफूले सोचेअनुरुप बिदाइ हुन पाउँदा आफ्नो खेल जीवनले सफलता पाएको प्रतिक्रिया दिए ।
त्यसपछि पुरस्कार वितरणको समारोह भयो । बंगलादेशका खेलाडीले पुरस्कार थापेपछि नेपाली खेलाडीहरू भीआईपी प्याराफिटको अतिथि कक्षतिर लागे । त्यति बेला पनि केही खेलाडीले ‘केपी बा वी लभ यु’को नारा लगाइरहेका थिए । तर, भिडमा केही खेलाडीले लगाएको नारा त्यति चर्चामा आएन ।
मेडल तथा पुरस्कार पाएपछि खेलाडीको फोटो सेसनमा बेग्लै उत्साह थियो । उत्साहका बीच खेलाडीको फोटो सेसनमा सहभागी हुन स्वयम् प्रधानमन्त्री ओली पनि अघि बढे । प्रधानमन्त्री ओली फोटो सेसनमा पुग्न नपाउँदै रंगशालामा एकाएक ‘केपी बा वी लभ यु’को नारा गुञ्जियो ।
हजारौँ दर्शकका बीच जब खेलाडीले नै ओलीको समर्थनमा नारा लगाए, सबैको ध्यान उतैतिर गयो । अनपेक्षाकृत रूपमा खेलाडीबाट लागेको नारालाई कतिपयले साथ दिए भने कतिपयले मजाकका रूपमा लिए । एक हिसाबले भन्ने हो भने खेलाडीले लगाएको ‘केपी ओली वी लभ यु’को नारा दर्शकका लागि ‘सरप्रराइज’ नै थियो ।
प्रोत्साहनभन्दा आलोचना धेरै
खेलाडीहरूले मैदानभित्र नै देशको प्रधानमन्त्रीलाई माया गरेर उनको पक्षमा नारा लगाउनुलाई अस्वाभाविक लिन नहुने कतिपयको तर्क छ । तर, देशको राजनीति उत्कर्षमा पुगेका बेला एमालेका अध्यक्ष समेत रहेका ओलीको पक्षमा खेलाडीले लगाएको नारालाई लिएर आलोचना समेत भइरहेको छ ।
ओलीका समर्थकले ‘केपी बा वी लभ यु’को नारालाई देशव्यापी रूपमा सञ्चालन गरिरहेको परिप्रेक्ष्यमा राष्ट्रिय टोलीका खेलाडीबाट नै सोही नारा लागेपछि यसलाई राजनीतिक नजरले समेत हेरिएको छ ।
‘केपी बा वी लभ यु’को नारा खेलाडीको ९० मिनेटको खेलपछिको तालिकामा भने थिएन । न त अखिल नेपाल फुटबल संघ (एन्फा)ले खेलाडीलाई ‘केपी बा वी लभ यु’को नारा लगाउन नै भनेको थियो ।
‘लहैलहै लागेर भन्यौँ’
नारा लगाउनेमध्येका एकजना खेलाडी एकपछि अर्कोले ‘केपी बा वी लभ यु’ भन्न थालेपछि सबै खेलाडीबाट सो नारा लागेको बताउँछन् । आफूहरूले लहैलहैमा नारा लगाएको उनको भनाइ छ । “खेलको जोसमा भएको बेला कुनै एक व्यक्तिले भन्दा हामी पनि सँगै भन्न थाल्यौँ, यो कसैले भन्न सुझाएको पनि होइन,” एक खेलाडीले भने ।
अहिले खेलाडीले लगाएको ‘केपी बा वी लभ यु’को नारालाई लिएर सामाजिक सञ्जालमा विवाद भइरहेको छ । विशेषगरी ओली समर्थकले नारालाई सामाजिक सञ्जालमा फैलाउने काम गरिरहेका छन् भने आलोचकहरूले राजनीतिक टिकाटिप्पणी गरिरहेका छन् ।