काठमाडौं । नेपाल कम्युनिस्ट पार्टी (एमाले) अध्यक्ष तथा प्रधानमन्त्री केपी शर्मा ओलीले एकपक्षीय रुपमा पार्टी नेताहरुको जिम्मेवारीमा 'व्यापक फेरबदल' गरे । आज बालुवाटारमा बसेको ओलीपक्षीय बैठकले केन्द्रीय कमिटी विस्तार, महाधिवेशन कमिटी, प्रदेश अध्यक्ष सचिव, इन्चार्ज र विभागीय प्रमुखको जिम्मेवारी तोके ।

सर्वोच्च अदालतको फैसलापपछि पार्टी ब्युँतिए पनि माधवकुमार नेपाल पक्ष पार्टीमा नफर्किनेमा ओली पक्ष ढुक्क रहेको र त्यसैअनुसार केही दिनको तयारीअनुसार आज बैठक बसेको स्रोतको दाबी छ ।

स्रोतका अनुसार आफूपक्षीय केन्द्रीय सदस्यहरुलाई आज दिउँसो ११ बजे बालुवाटारमा उपस्थित हुनू भनेर पठाएको म्यासेज नेता माधवकुमार नेपालपक्षीय दुईजना नेताकहाँ पनि पुगेको खुलेको छ ।

नेपालनिकट स्थायी कमिटी सदस्य सुरेन्द्र पाण्डे र केन्द्रीय कमिटी सदस्य राजनकुमार राईलाई उक्त म्यासेज झुक्किएर पुगेको एक नेताले जानकारी दिए ।

नेपाल कम्युनिस्ट पार्टी (नेकपा) राजनीतिक रुपमा विभक्त हुँदा नेपाल पक्षले फरक बाटो तय गरेको र अहिले पार्टीमा फर्किए पनि दुखै दिने भएकाले उक्त पक्षलाई बैठकमा नबोलाउने निष्कर्षमा पुगेको स्रोतको जिकिर छ ।