काठमाडौं । देशभर पछिल्लो चौबीस घण्टामा थप ८१ जनामा कोभिड-१९ (कोरोना भाइरस) को सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार पछिल्लो समय दुई हजार ८२४ को स्वास्थ्य परीक्षण गर्दा ३५ महिला र ४६ पुरुषमा सङ्क्रमण पुष्टि भएको हो । त्यस्तै पछिल्लो चौबीस घण्टामा कोरोना संक्रमणबाट दुईजनाको मृत्यु भएको छ ।
आजसम्म नेपालमा कोरोना भाइरस सङ्क्रमितको सङ्ख्या दुई लाख ७४ हजार ६५ पुगेको छ । त्यस्तै पछिल्लो समय थप ४८ जना निको भएका छन् । यससँगै निको हुनेको सङ्ख्या दुई लाख ७० हजार ३२५ रहेको छ । निको हुने दर भने ९८ दशमलव ६ प्रतिशत छ ।
अहिले देशभर ९८६ सक्रिय सङ्क्रमित छन् । ६२ जना क्वारेन्टिनमा छन् । हालसम्म नेपालमा २१ लाख ६० हजार ४०४ को पीसीआर परीक्षण भएको छ । पछिल्लो समय कोरोनाको कारण थप दुईजनाको मृत्यु भएको छ । यससँगै हालसम्म दुई हजार ७७३ जनाले कोरोनाका कारण ज्यान गुमाएको मन्त्रालयले जनाएको छ । -रासस
