काठमाडौं । सरकारले छिटै प्रतिबन्धित नेपाल कम्युनिस्ट पार्टी नेत्रविक्रम चन्द विप्लव समूहसँग वार्ता गर्ने तयारी गरेको छ । सुरक्षा परिषद्को मंगलबार बसेको बैठकले विप्लवसँग वार्ताको तयारी थाल्ने र त्यसको प्रक्रिया सुरु गर्ने निर्णय गरेको एक सदस्यले जानकारी दिए ।
“विप्लव समूहसँग छिटै वार्ता हुन्छ । सरकारले त्यसको प्रक्रिया सुरु गर्छ,” स्रोतले बाह्रखरीसँग भन्यो, “सरकारले अब वार्ता आह्वान प्रतिबन्ध फुकुवालगायत प्रक्रिया सुरु गर्छ र वार्ताको प्रक्रिया अघि बढाउँछ ।” सरकारले अनौपचारिक रूपमा विप्लव समूहसँग संवाद अघि बढाएको थियो । केही दिनअघि मात्रै खानेपानीमन्त्री मणिचन्द्र थापाले नख्खु जेल पुगेर विप्लव समूहका नेता हेमन्तप्रकाश ओलीलाई भेटेका थिए ।
त्यसअघि पनि विभिन्न हिसाबले सरकारले विप्लव समूहसँग छलफल अघि बढाएको थियो । दुई दिनअघि मात्रै विप्लवले पनि वार्ताका लागि सकारात्मक रहेको बताएका थिए ।
सुरक्षा परिषद्का एक सदस्यले पनि विप्लवसँग वार्ता हुने विश्वास व्यक्त गरे । आजै बसेको मन्त्रिपरिषद् बैठकमा पनि यसबारे छलफल भएको थियो । औपचारिक निर्णय नभए पनि सरकार विप्लवसँग वार्ता गर्ने मनस्थितिमा रहेको संघीय मामिला तथा सामान्य प्रशासनमन्त्री गणेशसिंह ठगुन्नाले बाह्रखरीलाई जानकारी दिए ।