बलिउड अभिनेत्री सारा अली खानले चलचित्र ‘केदारनाथ’बाट बलिउडमा डेब्यु गरेकी हुन् । सन् २०१८ देखि अर्थात् बलिउडमा प्रवेश गरेदेखि नै उनले दर्शकका लागि उत्साहजनक प्रोजेक्टस् (चलचित्र) हरू दिइरहेकी छन् । अभिनय यात्राको मात्र दुई वर्षको छोटो अवधिमा उनले रणवीर सिंह, सुशान्तसिंह राजपुत र वरुण धवनजस्ता अब्बल अभिनेताहरूसँग काम गरिसकेकी छन् ।
हालै अक्षयकुमार र धनुषसँग काम गरेको ‘अतरंगी रे’ पनि रिलिज भइसकेको छ । तर के सारा सोलो (एकल) फिल्मको नेतृत्व गर्न तयार भइसकेकी छन् ? सारा स्वयं यसो भन्छिन् :
चलचित्रमा उनको सोलो नेतृत्व
मलाई थाहा छैन । मलाई कसैले चलचित्रको कथा सुनाउँदा, त्यो कथा वा भनौं विषय दर्शकलाई सुनाउनुपर्छ जस्तो लाग्यो भने मैले गर्ने हो । चाहे त्यो कथा म एक्लैले सुनाइरहेको होस्, मेरो छोटो भूमिका होस् वा ठूलो । अन्ततः म एउटा राम्रो र सान्दर्भिक कथा भन्न चाहन्छु ।
उनको योजना
मेरो अभिनय करियरमा, म आज कमर्सियल चलचित्र गर्छु, भोलि सिरियस र पर्सि सोलो फिल्म गर्छु भनेर कहिल्यै सोचिनँ । त्यसरी कहिले चल्दैन पनि । मेरा लागि मेरो काम भनेकै कथा भन्नु हो । मलाई भन्नुपर्छ भन्ने लागेको कथा दर्शकलाई सुनाउने हो । त्यसैले त्यो चलचित्रमा म सोलो वा म सानो भूमिकामा मात्रै छु कि भन्ने कुराले केही फरक पार्दैन ।
उनको लोभ
तर ‘अन्तरंगी रे’ पछि भने म लोभी हुन थालेँजस्तो मलाई लाग्छ । र मैले राम्रा कामहरू मात्रै गरूँ जस्तो लाग्न थालेको छ । यसको मतलब म एक्लैले मात्रै गर्छु भन्ने होइन ।
म केवल त्यस्तो भूमिका र पात्र मात्रै निभाउन चाहन्छु जुन मैले निभाउन सक्छु र जसका लागि म सक्षम पनि छु । म त्योभन्दा बढी त्यसलाई जटिल बनाउन चाहन्नँ ।
बक्स अफिस नम्बर
म हलका लागि कलाकार बनेको हुँ र हल नै मेरो प्रथम दर्शक हो । डिजिटल रिलिज हुनुको बेफाइदा भनेको, मेरो चलचित्र रिलिज भइरहँदा बक्स अफिस नम्बर चेक गर्न पाउँदिनँ र हलमा गएर नाच्न पाउँदिनँ ।
समय बुझ्न आवश्यक
कलाकार, मनोरञ्जनकर्ताका हिसाबले अहिलेको समयलाई बुझ्न जरुरी छ । पूरा विश्व नै आक्रान्त बनाइरहेको अहिलेको महामारीको अवस्थामा हाम्रो जिम्मेवारी र अहिलेको आवश्यकता भनेकै तपाईंलाई घरमै केही मनोरञ्जनात्मक र रमाइला खुराक पस्किने हो ।
हाम्रो उद्देश्य
मनोरञ्जनकर्ताका हिसाबले यदि छोटो समयका लागि भए पनि तपाईंको तनाव बिर्साएर हसाउन सक्नु नै हाम्रो काम र उद्देश्य हो । त्यसैले हलमा होस् वा घरमै, तपाईं आफ्नो पूरा परिवारसँग बसेर हाम्रो चलचित्र हेरेर खुसी हुनुस् भन्ने हाम्रो अपेक्षा हो ।
(कोईमोई डटकम)