काठमाडौं । सावित्रा भण्डारीले ५ गोल गरेपछि साविक विजेता एपीएफ क्लबले राष्ट्रिय महिला लिग फुटबलमा आफ्नो अपराजित यात्रालाई शनिबार पनि कायम राखेको छ ।
शनिबार सातदोबाटोस्थित अखिल नेपाल फुटबल संघ (एन्फा) कम्प्लेक्समा भएको पहिलो खेलमा एपीएफले वालिङ नगरपालिकालाई ६–० ले हरायो । सावित्रा एक्लैले ५ गोल गरिन् भने प्रिती राईले एक गोल थपिन् ।
एपीएफले मोफसलमध्येको बलियो टिम वालिङविरुद्ध सातौँ मिनेटमा सावित्राको गोलबाट अग्रता बनाएको थियो । खेलको १६औँ मिनेटमा सावित्राले व्यक्तिगत दोस्रो गोल गर्दा २०औँ मिनेटमा उनले ह्याट्रिक पूरा गरेकी थिइन् । इन्जुरी समयमा प्रितीले गोल गरेपछि पहिलो हाफमा एपीएफ ४–० ले अघि रहेको थियो । दोस्रो हाफमा एपीएफले थप दुई गोल थपेको थियो । खेलको ६४औँ मिनेटमा सावित्राले व्यक्तिगत चौथो गरिन् भने इन्जुरी समयमा पाँचौँ गोल गर्दै एपीएफलाई ६–० को सहज जित दिलाइन् ।
योसँगै एपीएफले जारी लिगमा लगातार नवौँ जित निकालेको छ । लिगअन्तर्गत पहिलो लेगको खेलमा एपीएफले वालिङलाई ३–० ले हराएको थियो । जितसँगै एपीएफले तालिकामा ९ खेलबाट २७ अंक जोडेको छ । एपीएफ शीर्ष स्थानमा छ । वालिङ ९ खेलबाट १४ अंक जोडेर तेस्रो स्थानमा रहेको छ ।
विराटनगर विजयी
लिगअन्तर्गत शनिबारै भएको दोस्रो खेलमा तालिकामा अंकको खोजीमा रहेको चौदण्डीगढी नगरपालिका विराटनगर महानगरपालिकासँग पराजित भएको छ । चौदण्डीगढीले लिएको सुरुवाती अग्रता कायम राख्न नसक्दा विराटनगर विजयी भयो ।
चौदण्डीगढीकी मनीता तामाङले आठौँ मिनेटमा गोल गर्दै टोलीलाई अग्रता दिलाएकी थिइन् । तर, खेलको १५औँ मिनेटमा पार्वती घलेले गोल गर्दै विराटनगरलाई १–१ गोलको बराबरीमा ल्याइन् । ८६औँ मिनेटमा पार्वतीले व्यक्तिगत दोस्रो गोल गर्दै विराटनगरको जित सुनिश्चित गरिन् ।
तस्बिरः एन्फा ।