वाशिङ्टन । संयुक्त राज्य अमेरिकामा ब्रिओना टेलरको मृत्युका प्रकरणमा कुनै पनि प्रहरी अधिकारीलाई अभियोग नलगाउने बृहत जुरीको फैसलाविरुद्ध भएको प्रदर्शनमा दुई प्रहरीमाथि गोली प्रहार भएको छ ।

१३ मार्चमा २६ वर्षीया टेलरको घर खानतलासी गर्ने क्रममा उनलाई गएका तीन प्रहरी अधिकारीहरुले उनलाई धेरै पटक गोली हानी हत्या गरेका थिए । 

बृहत जुरीको फैसलापछि केन्टकी राज्यको लुइजिभिलामा हजारौं मानिसहरु प्रदर्शनका लागि सडकमा उत्रिएका थिए । बृहत जुरीले गरेको फैसला अनुसार एक प्रहरी अधिकारीमाथि टेलरका ब्वाइफ्रेन्डले गोली चलाएका थिए र आफ्नो बचाउका लागि प्रहरीले पनि गोली चलाएका थिए ।  अन्य दुई जनाको भूमिकाबारे अहिले निर्णय गरिएको छैन । 

प्रहरीको गोली लागेर मृत्यु भएकी टेलरका लागि न्यायको माग गर्दै प्रदर्शन भइरहेको छ । गोली प्रहार गर्ने प्रहरी अधिकारी ब्रेट हान्किन्सनमाथि अभियोग दर्ता भएको छ । अन्य दुईजनामाथि भने अभियोग दर्ता भएको छैन । 

प्रदर्शनको क्रममा गोली लागेका दुई प्रहरी अधिकारीको अवस्था खतरामुक्त रहेको लुइजभिलका प्रहरी प्रमुख रोबर्ट शोर्डरले बताएको अमेरिकी सञ्चारमाध्यमले जनाएका छन् । गोली प्रहार गरेको अभियोग लागेका व्यक्तिलाई नियन्त्रणमा लिइएको जनाइएको छ । 

लुइजभिलमा आपतकालीन अवस्था घोषणा गरिएको छ र नेशनल गार्ड तैनाथ गरिएको छ । मेयर ग्रेग फिशरले सहरमा तीन दिनका लागि कर्फ्यु जारी गरेका छन् ।

कर्फ्युको उल्लंघन गर्दै प्रदर्शनकारीहरु सडकमा जम्म भएका छन् । केन्टकीका गभर्नर एण्डी बेशरले प्रदर्शनकारीलाई घर फर्किन अपिल गरेका छन् । - बीबीसी