काठमाडौं । केही खाँदा स्वाद महसुस नहुनु र कुनै चिजको गन्ध नआउनु पनि कोरोनाका लक्षण हुन सक्ने बेलायती शोधकर्ताहरुले बताएका छन् । लन्डनको किङ्स कलेजको एक टोलीले कोरोनो भाइरसका सन्दिग्ध लक्षण एपमा रिपोर्ट गर्ने करिब चार लाख मानिसको डाटा अध्ययनबाट यस्तो तथ्य पत्ता लागेको हो ।
चिसो महसुस हुनु, स्वास लिन कठिन हुनुका साथै गन्ध र स्वाद थाहा नपाउनु पनि कोरोनाको लक्षण हुन सक्ने नयाँ शोधले देखाएको छ । विशेषज्ञहरुका अनुसार ज्वरो, खोकी भाइरसको सम्भावित र महत्वपूर्ण लक्षण हो नै साथमा नयाँ लक्षणलाई पनि नजरअन्दाज गर्न मिल्दैन ।
किङ्स कलेजका शोधकर्ताहरु कोरोना भाइरसका बारेमा थप जानकारी जुटाउन लागिपरेका छन् । उनीहरु चाहन्छन् आफ्नो शोधबाट विशेषज्ञलाई मद्दत पुगोस् र रोगबारे थ जानकारी प्राप्त होस् ।
शोधार्थीका अनुसार कोभिड सिम्पटम ट्र्याकर एपमा रिपोर्ट गर्नेमध्येबाट ५३ प्रतिशतले थकान, २९ ले लगातार खोकी, २८ ले स्वास लिन गाह्रो, १८ ले गन्ध महसुस र स्वाद नपाउने तथा १०.५ प्रतिशतले ज्वरो आएको उल्लेख गरेका थिए । एपमा सहभागी चार लाखमध्ये १७०२ को कोभिड –१९ परीक्षण भएको र ५७९ मा पोजिटिभ पाइएको थियो । जसको पोजिटिभ नतिजा आयो तीमध्ये ५९ प्रतिशतले आफूलाई स्वाद थाहा पाउन र गन्ध महसुस हुन छाडेको बताएका थिए ।
यद्यपि, विशेषज्ञहरु अहिले पनि स्वाद र गन्धलाई कोरोनाको लक्षण मानिहाल्न तयार छैनन् । उनीहरु यसको पर्याप्त प्रमाणको अध्ययनमा लागेका छन् । विश्व स्वास्थ्य सङ्गठनले पनि यी दुई लक्षणलाई कोरोनाको सूचीमा राखेको छैन ।
ईएनटी यूके (बेलायतमा आँखा, नाक, कान घाँटी विशेषज्ञ डाक्टरहरुको प्रतिनिधि समूह) का अनुसार भाइरस सङ्क्रमितले गन्ध र स्वाद थाहा नपाउँदा डराउनु नपर्ने, यो कोरोना सङ्क्रमणकै कारण हुनुपर्छ भन्ने छैन । उता, किङ्स कलेजका शोधार्थी भने स्वाद र गन्ध थाहा नपाउनु कोरोनाका अतिरिक्त लक्षण मान्नुपर्ने बताइरहेका छन् ।
टोली प्रमुख प्रा. टिम स्पेक्टर भन्छन्, ‘‘यदि कोभिड–१९को अन्य लक्षणसहित स्वाद र गन्ध थाहा पाउने क्षमता गुमेको छ भने तपाईं स्वयम्ले आफूलाई आइसोलेट गर्नु उपयुक्त हुन्छ, यसो गर्नाले अरुलाई सर्न पाउँदैन ।’’ (बीबीसी)