काठमाडौं । बिहान सबेरै केही पसल खुले । तर ग्राहकको चहलपहल बढेन । हिजो केही चहलपहल देखिए पनि आज त्यो दोहोरिएन । आएका ग्राहक पसल र्यागभन्दा अलि पछाडि नै बसे । कारण पसलेले कोरोना भाइरस (कोभिड–१९)को संक्रमणको जोखिम कम होस् भनेर दूरी कायम गर्न डोरी टाँगेका थिए । डोरीबाहिरबाट ग्राहकले आफूलाई चाहिएको सामग्री मागे । पसलेले दिए । ग्राहकले सामान खरिद गरे वापतको पैसा दिए । सर्जिकल माक्स र सर्जिकल ग्लोब्स लगाएका पसलेले पैसा लिए । उनले संक्रमणको जोखिम न्यूनिकरणका यो सावधानी अपनाएका हुन् । यो दृश्य बिहीबार बिहान मध्येबानेश्वरस्थित मिलनचोकको हो ।
गोरखाका कुमार विश्वकर्माले मिलनचोकमा तरकारी र फलफूल पसल सुरू गरेको थुप्रै वर्ष भयो । उनको पसलमा एक नासले ग्राहकको भीड लाग्थ्यो । तर आज उनको पसलमा न ग्राहकको भीड लाग्यो, न त उनको पसलमा पर्याप्त तरकारी नै छ । कुमार होलसेलमा तरकारी लिन गएनन् । फलफूल भने उनको पसलमै आइपुग्यो । त्यसैले उनले केही फलफूल राखेर आज त्यही बेचे । भोलिबाट पसल नै खोल्ने सोचमा छैनन्, कुमार ।
“जोखिम मोलेर के पैसा कमाउनु । तरकारीको होलसेलमा भीड लाग्छ । यहाँ बेच्न राखेपछि पनि ग्राहकको भीड लाग्छ, त्यसैले तरकारी राखिन,” कुमार भन्छन्, “फलफूलमा भीड लाग्दैन, त्यसैले राखेको हुँ । यो पनि आज अन्तिम दिन हो, भोलिबाट पसल नै खोल्दिन ।”
कुमारको पसलमा फाट्टफुट्ट ग्राहक देखिए पनि छेउमै खुलेको किराना पसलमा ग्राहक थिएनन् । ग्राहकको पर्खाइमा साहुजि थिए । तर ग्राहक थिएनन् ।
पसलमा सामान खरिद गर्न आउने अधिकांशले माक्स लगाए पनि पञ्जा भने कमैले मात्रै लगाएका थिए । तरकारी पसलमा कुन तरकारी कति ताजा र मूल्य कति भन्दै छाम्दै सोद्ने मध्ये केहीको हातमा मात्रै पञ्जा देखिन्थ्यो ।
मिलनचोकका दिनेश खड्का पनि दूध किन्न डेरी जाँदै थिए । उनको मुखमा माक्स त थियो तर हातमा पञ्जा थिएन । किन ? “सायद बानी नभएर पनि होला । अर्को कुरा माक्स जस्तो जुनसुकै पसलमा किन्न नपाइने भएकाले पनि होला”, दिनेश भन्छन्, “कोरोनाको संक्रमणबाट बच्न पञ्जा पनि लगाउनु पर्छ भन्ने त थाहा छ, तर आजसम्म लगाउन चाहिँ थालेको छैन ।”
सरकारले लक डाउन गरे पनि भीडभाड नगरी दूरी राखेर दैनिक उपभोग्य सामग्री खरिद गर्न बिहान र बेलुका केही समय पसल खोल्न दिएको छ ।
