एजेन्सी । बार्सिलोनाका कप्तान लियोनल मेस्सीले विश्वभर फैलिएको कोरोना भाइरसविरुद्ध लड्न एक मिलियन युरो आर्थिक सहयोग गरेका छन् ।

मेस्सीले बार्सिलोनाको एक अस्पताल र आफ्नै देशको अर्को एक मेडिकल सेन्टरलाई आर्थिक सहयोग गरेको रिपोर्टमा उल्लेख गरिएको छ । “मेस्सीले अस्पतालमा कोरोना भाइरससँग लड्न अनुदान दिएका छन् । तपाईको प्रतिबद्धता र समर्थनका लागि धेरै धेरै धन्यावाद”, अस्पतालले ट्विटरमा लेखेको छ । 

उनीसँगै बार्सिलोनाका पूर्व खेलाडी तथा म्यानचेस्टर सिटीका प्रशिक्षक पेप गार्डिओलाले पनि एक मिलियन युरो सहयोग गरेका छन् । दुवैले एन्जल सोलर फाउन्डेसन र बार्सिलोनाको मेडिकल कलेजले सुरु गरेको अनुदान अभियानमा सहयोग गरेका हुन् । 

“गार्डिओलाले कोरोना भाइरस नियन्त्रण गर्न स्वास्थ्य उपकरण र आपूर्तिका लागि फाउन्डेसनलाई एक मिलियन युरो अनुदान दिए”, कलेजले विज्ञप्तिमा लेखेको छ ।

स्पेन इटालीपछि युरोपको सबैभन्दा बढी कोरोना संक्रमित राष्ट्र हो । स्पेनलमा हालसम्म ४० हजारभन्दा बढी संक्रमित व्यक्ति भेटिएका छन् भने दुई हजार ६९६ ले ज्यान गुमाएका छन् ।