काठमाडौं । सरकारले क्वारेन्टाइनस्थल निर्माण र व्यवस्थापनका विषयमा सुरक्षा निकायहरूसँग जानकारी लिइरहेको छ ।
सोमबार संस्कृति, पर्यटन तथा नागरिक उड्डयनमन्त्री योगेश भट्टराईको संयोजकत्वमा बनेको समितिले क्वारेन्टाइनस्थ निर्माणका लागि सुरक्षा निकायहरूसँग जानकारी लिएको हो । उच्चस्तरीय समन्वय समितिले पर्यटनमन्त्री भट्टराईको संयोजकत्वमा समिति बनाएर क्वारेन्टाइन व्यवस्थापनको जिम्मा दिएको छ ।
समितिले सुरक्षा निकायहरूसँग सोमबार यसबारे छलफल गरेको हो । सोमबार बिहान सेनाका पदाधिकारीहरूलाई बोलाएर खरिपाटी क्वारेन्टाइनको अवस्था र अन्य ठाउँमा निर्माण गर्न सकिने सम्भाव्यताका विषयमा जानकारी लिएका हुन् ।
छलफलमा प्रमुख सेनानी शिवप्रसाद पौडेलले क्वारेन्टाइनस्थल व्यवस्थापनका लागि केही समस्या देखिएको बताए । आर्थिक व्यवभारका विषयमा स्पष्ट निर्देशन नहुँदा आन्तरिक स्रोत परिचालन गरी सेनाले तत्कालको समस्या टारिरहेको उनले बताए । खरिपाटीमा खाना पकाउने र सर्भिस गर्ने मान्छेको अभाव रहेको उल्लेख गर्दै पौडेलले तीनवटै सुरक्षा निकायको टोलीले काम गरिरहेको बताए ।
खरिपाटीमा क्वारेन्टाइनमा अहिले ८ महिलासहित ८१ जना छन् । जसमा एकजना ७६ वर्षीया, एक गर्भवती र एकजना ७१ वर्षीय विदेशी छन् । होटल र अन्य ठाउँबाट पनि क्वारेन्टाइनका लागि कोठाहरू उपलब्ध भएको प्रस्ताव आइरहेको सेनाले जनाएको छ । खरिपाटीमा क्वारेन्टाइनमा प्रतिव्यक्ति एक दिनमा पानी र प्याकिङबाहेक ७५० रुपैयाँ खर्च हुँदै आएको छ ।