काठमाडौं । कोरोना भाइरसको संक्रमण (कोभिड १९) को त्राससँगै बजारमा मास्कको कालोबजारी सुरु भएको छ । 

कोरोना संक्रमण रोक्ने भनिएको (एन नाइन्टी फाइभ) मास्क मात्र नभइ नेपालमै उत्पादन हुने सर्जिकल मास्कमा समेत कालोबजारी सुरु भएको हो । 

केही समयअघि १० रुपैयाँमा किन्दै आएको ‘युज एन्ड थ्रो’ मास्क अहिले ५० रुपैयाँमा किन्नुपर्ने र कतिपय अवस्थामा त्यो पनि पाउन छाडेको नयाँ बानेश्वरमा बस्दै आएका मनोज ओझाले बताए ।

यसअघि मेडिकलमा पाउँदै आएको सर्जिकल मास्कसमेत पाउन उपभोक्तालाई समस्या भएको छ । उपत्यका मात्रै नभई देशका विभिन्न स्थानमा मास्क पाउन छाडेको छ ।

नेपालमा करिब ७५ प्रतिशत मास्क चीनबाट आयात हुने गरेको छ ।  तर चीनमा कोरोनाभाइरसको संक्रमणले गर्दा नेपालमा मास्क आयात हुन सकेको छैन । 

चीनले मास्क पठाउन छोडेपछि नेपालमा मास्कको अभाव भएको औषधि व्यवसायी संघको दाबी छ । 

संघका अनुसार नेपालमा भारतबाट २५ प्रतिशत र चीनबाट ७५ प्रतिशत मास्क आउने गरेकोमा चीनले जनवरी ३१ बाट मास्क पठाउन रोकेको छ ।

नेपालमै मास्क उत्पादन गर्ने कम्पनी रहे पनि नेपाली उत्पादनले धान्न नसकेको बिक्रेता बताउँछन् । 

काठमाडौंको थापाथलीस्थित एक बिक्रेताले भने,‘‘दैनिक विभिन्न संघ संस्थाले लाखौं मास्कको माग गर्छन् । तर पछिल्लो एक महिनायता मास्क पठाउन सकिएको छैन । दैनिक सयौं व्यक्ति मास्क खोज्न आउँछन् । मास्क, मास्क भन्दै हैरान पारिसके ।’’ 

मास्कको साँच्चिकै अभाव भएको हो वा कृतिम अभाव सिर्जना गरिएको हो सरकारी संयन्त्रले अनुगमन गर्नुपर्ने सेवाग्राही बताउँछन् । 

एक मेडिकल सञ्चाकलका अनुसार बजारमा मास्क, स्यानिटाइजर, ग्लोब्सलगायतका वस्तुहरुको पनि अभाव छ । 

उनले भने,“केही समय एक प्याकेट मास्कको अगाडि २५० रुपैयाँ पर्ने मास्क अहिले होलसेलले नै १५ सय भन्दा धेरै लिन लागे । त्यसपछि हामीले मास्कको व्यापार गर्न नै छाड्यौँ ।”

थापाथलीमा रहेको सोसाङ फार्मेसीमा ‘यहाँ मास्क छैन’ नै भनेर लेखेर टासिएको छ । 

टेकु अस्पतालमा कोरोनाको आशंकामा ‘आइसोलेसन’मा बसेको समाचार सार्वजनिक भएपछि मास्कको खोजी गर्नेको संख्या ह्वात्तै बढेको व्यवसायी बताउँछन् ।

तर अस्पतालले भने अहिलेसम्म आइसोलेसनमा बसेका २३ जनामा कोरोना पुष्टि नभएको स्पष्ट पार्दै आएको छ ।

फार्मेसीमा मात्र नभएर अस्पतालमा समेत मास्कको अभाव देखिएको छ । थापाथलीस्थित परोपकार प्रसूति तथा स्त्रीरोग अस्पतालमा सहयोगीको रुपमा काम गर्दै आएकी एक महिलाले अस्पतालले आफूहरुलाई केहि हप्तादेखी मास्क दिन दिन छाडेको बताइन् ।

उनका अनुसार अस्पतालको अपरेसन थिएटरबाहेक अरुलाई मास्क दिन छाडिएको छ । 

एन ९५ मास्क चीनबाट आयात गरिँदै आएको थियो । जसको मुल्य २ सयदेखि माथि पर्ने व्यवसायी बताउँछन् ।

राम्रो खालको मास्कलाई पाँचहजारसम्म पर्ने उनीहरुको भनाइ छ । तर अहिले त्यो मास्क पाइँदैन, कतै पाइहालियो भने तीनगुणासम्म बढी तिर्नुपर्छ ।

चीनको वुहान प्रान्तबाट सुरु भएको नोबेल कोरोना भाइरसको संक्रमण नेपालमा पनि भित्रिन सक्ने आशंकामा सरकारले ५ मुलुकका नागरिकलाई ‘अन अराइभल’ भिसा समेत नदिने निर्णय समेत गरिसकेको छ ।