निगमका २५ पाइलटको सामूहिक राजीनामा, बाँकी रहेका सबैले राजीनामा दिने तयारी 

निगमका २५ पाइलटको सामूहिक राजीनामा, बाँकी रहेका सबैले राजीनामा दिने तयारी 

काठमाडौं ।  नेपाल  वायुसेवा निगमका नेपाली पाइटलले सामूहिक राजीनामा दिएका छन् ।  नेपाल वायुसेवा निगमका २५ जना पाइलटले सामूहिक राजीनामा दिएका हुन् ।

निगमको इतिहासमै पहिलो पटक यति धेरै पाइलटले एकै पटक राजीनामा दिएका हुन् । 

निगमको अन्तर्राष्ट्रिय उडान भर्ने पाइलटहरुले राजीनामा दिएका हुन् । 

अन्तर्राष्ट्रिय उडान भर्ने पाइलटमा ४० जना नेपाली छन् भने विदेशी १५ जना छन् ।  ४० जनामध्ये २५ जनाले विहिबार सामूहिक राजीनामा दिएका हुन् ।  अन्य नेपाली पाइलटले पनि राजीनामा दिने तयारी गरेको एक पाइलटले बताए । 

उनले भने,“अहिले उहाँहरु काठमाडौंमा हुनुहुन्न, आएपछि अरु पाइलटले पनि राजीनामा बुझाउनुहुन्छ ।” 

निगम व्यवस्थापनले विदेशी पाइलट र स्वदेशी पाइलटबीच विभद गरेकाले राजीनामा दिन बाध्य भएको ती पाइलटले बताए । 

उनले भने, “विदेशी पाइलटको ट्याक्स पनि निगमले तिर्छ र उनीहरुलाई १३ देखि १५ लाख रुपैयाँसम्म दिन्छ । नेपाली पाइलटले उनीहरुले भन्दा डबल काम गर्छन् तर तलब बढीमा २ लाख रुपैयाँ भन्दा हुन्न ।” 

निगमले नेपाली पाइलटको केही समयअघि दुई महिनाको तलब नदिएको र विगत पाँच महिनादेखि बिनासूचना एक लाख रुपैयाँ पनि अतिरिक्त रकम काटेको गुनासो पाइलटको छ । 

उनले भने,“ट्याक्स पनि काटेको छ, अतिरिक्त १ लाख रुपैयाँ पनि काटेको छ, अनि हामीले कसरी काम गर्न सक्छौं?” 

दुईवटा छन् माग

राजीनामा दिएका नेपाली पाइलटको दुई वटा माग छन् । पहिलो, विदेशी पाइलटको ट्याक्स निगमले तिरिदिए जस्तै नेपाली पाइलटको पनि तिर्नुपर्ने । अर्को, ट्याक्स तिर्न नसक्ने भए नेपाली पाइलटलाई करारमा लिनुपर्ने । निगममा स्थायी भएर मात्रै केही नभएको भन्दै कि ट्याक्स तिरिदिनुपर्ने कि करारमा काम लगाउनुपर्ने ती पाइलटहरुको माग छ । 

राजीनामा दिएका पाइलट के भन्छन् ?

विदेशी पाइलटहरुको ट्याक्स नेपाल एअरलाइन्सले नै तिरिरहेको छ । उनीहरुलाई १३ देखि १५ लाख रुपैयाँसम्म पनि दिइरहेको छ । 


नेपाली स्थायी पाइलटहरुको हकमा व्यवस्थापनले सूचनाबिना केही समयअघि २ महिनाको तलबै दिएन ।  त्यसपछि पनि पछिल्लो पाँच महिनादेखि हरेक महिना ट्याक्स काटेर पनि अतिरिक्त एक लाख रुपैयाँ काटिरहेको छ । 

किन काटेको त्यसको जानकारी छैन । विदेशीले ४५ घण्टा उडाउँछन् । नेपाली पाइलटले ९० घण्टा उडाउँछन् ।  ९० घण्टा उडाएर पनि नेपाली पाइलटले धेरैमा २ लाख रुपैयाँ नत्र १ लाख मात्र पाइरहेका छन् । जबकि विदेशी पाइलटले नउडि १५ लाख पाइरहेका छन् । 

कुनै पनि पैसा काट्दै छ भने के कारणले काट्दैछ भन्ने थाहा दिनु पर्दैन ? कुनै पनि सुचना नदिइ केही समयअघि दुई महिनाको तलब नै दिएन । पछिल्लो पाँच महिनादेखि हरेक महिना अतिरिक्त १ लाख रुपैयाँँ काटिरहेको छ, तर किन काटेको जानकारी गराइएको छैन । 

हामीले भनेको के हो भने विदेशी पाइलटको ट्याक्स निगमले तिर्छ भने नेपाली पाइलटको पनि निगमले नै तिर्नुपर्छ । 

त्यसले हामीलाई राहत हुन्छ । यदि त्यो गर्न व्यवस्थापन सक्दैन भने हामीलाई करारमा लिए हुन्छ । 

स्थायी भएर केही फाइदा छैन । 

हामी करारमा काम गर्न तयार छौं । यी दुई वटा माग पूरा गर्न सक्दैन भने हामीले भनेका छौं आगामी तीन महिनापछि निगममा फर्कदैनौं ।

राजीनामाको तयारी जनवरी १७ मै

नेपाली पाइलटहरुले जनवरी १७ अर्थात् माघ ३ गतेदेखि नै यसबारे जानकारी गराइसकेका थिए । एकैपटक नेपाली पाइलटहरुले राजीनामामा हस्ताक्षर गर्न नसक्दा बिहीबार मात्रै राजीनामा बुझाएका हुन् । 
 

हिमाल पौडेल

प्रतिकृया दिनुहोस
ad