अमेरिकी राष्ट्रपति डोनाल्ड ट्रम्पको प्रशासनले चाँडै 'खुला आकाश' सन्धीबाट बाहिरिने घोषणा गर्ने भएको छ । अमेरिकी अधिकारीका अनुसार उक्त कदमको कंग्रेसमा डेमोक्रेटहरुले निन्दा गरेका थिए ।
सन् १९९२ मा ३४ मुलुकबीच हस्ताक्षर भएको उक्त सन्धी सन् २००२ बाट लागु भएको थियो । उक्त सन्धी अनुसार सन्धीमा हस्ताक्षर गर्ने मुलुकहरुको आकाशमा गैरसैन्य निगरानी गर्ने विमान उडानको अनुमति प्रदान गरेको थियो । उक्त सन्धीले रुसी तथा अन्य सदस्य राष्ट्रहरुले अमेरिकी सैन्य शक्तिहरुमाथि हवाइ निगरानी राख्दा असर पर्ने भएकोले अमेरिकाले बाहिरिने निर्णय गर्न लागेको हो ।
अमेरिकी रक्षा विभाग अर्न्तगतको यूएस डिफेन्स थ्रेट रिडक्सन एजेन्सीका अनुसार उक्त सन्धीले सैन्य नियन्त्रण सहमतिलाई प्रमाणित गर्न सहयोग गरिरहेको छ । उक्त सन्धी सदस्य मुलुकबीच आपसी समझदारी र विश्वास दिलाउने योजनाका साथ तयार गरिएको अमेरिकी स्टेट डिपार्टमेन्टले जनाएको छ । उक्त सन्धीले हवाइ निगरानीमार्फत सैन्य शक्तिको सूचना संकलन र अन्य सैन्य गतिविधि बुझ्न अनुमति प्रदान गरेको थियो ।
यो ट्रम्प प्रशासनले बाहिरिने घोषणा गर्न लागेको मुख्य अन्तर्राष्ट्रिय सन्धी हो । यसअघि अगस्टमा अमेरिका मध्यम-दूरी आणविक शक्तिसम्बन्धी सन्धीबाट बाहिरिएको थियो । उक्त सन्धीमा रुस र अमेरिकाबीच भएको थियो ।
पछिल्ला घटनाक्रमले अमेरिका र मस्कोबीच नयाँ र भयानक सैन्य प्रतिस्पर्धा बढिरहेकोप्रति विश्लेषकहरुले चिन्ता व्यक्त गरेका छन् । सीएनएनका अनुसार अमेरिका सेनाले रुस र युरोपलाई चेतावनी दिन नयाँ गैर-आणविक मोबाइल-लन्च क्रुज मिसाइल प्ररीक्षण गर्ने तयारीसमेत गरेको छ ।
सीएनएन