प्रतिनिधि तस्बिर

काठमाडौं । नेपाल सरकारलाई अन्तर्राष्ट्रिय समुदायले महिला हिंसाका कुनै पनि किसिमका घटनामा शून्य सहनशीलता अपनाउन आग्रह गरेका छन् । नेपालस्थित संयुक्त राष्ट्रसंघ र बेलायत, अस्ट्रेलिया,  फ्रान्स, नर्वे, स्विट्जरल्यान्ड, फिनल्यान्ड दूतावासले संयुक्त वक्तव्य जारी गर्दै महिला हिंसाका घटना बढेकोले अन्तर्राष्ट्रिय कानुन अनुसार शून्य सहनशीलताको नीति अवलम्बन गर्न आग्रह गरेका हुन् । 

नेपालमा निवर्तमान सभामुख कृष्णबहादुर महरामाथि संसद सचिवालयकै महिला कर्मचारीमाथि यौन दुर्व्यवहार गरेको आरोप लागेको बेला अन्तराष्ट्रिय समुदायले पीडितलाई अन्तर्राष्ट्रिय कानुनअनुसार न्याय सुनिश्चितता गर्न ध्यानाकर्षण गराएका हुन् । 

अन्तर्राष्ट्रिय समुदायले जारी गरेको विज्ञप्तिमा भनिएको छ, "अन्तर्राष्ट्रिय समुदायको  महिलाविरुद्धकी विशेष प्रतिनिधिको  सन् २०१८ नोभेम्बरा भएको नेपाल भ्रमणका क्रममा नेपालमा यौन हिंसा र महिलाविरुद्धका हिंसामा दण्डहिनता बढेको घटनाप्रति ध्यानाकर्षण भएको छ । निर्मला पन्त र माया विकका परिवारले न्याय खोजीका क्रममा निकै चुनौती सामना गर्नु पर्‍यो । अन्तर्राष्ट्रिय मान्यता र अन्तर्राष्ट्रिय कानुन अनुसार नेपाल सरकारले घटनाका विषयमा निष्पक्ष छानबिन गर्नुपर्छ ।" 

महिलाविरुद्ध हुने हिंसा अन्त्य गर्ने समितिको ३५ नम्बर सिफारिस कार्यान्वयन गर्न समेत आग्रह गरेका छन् । विज्ञप्तिमा भनिएको छ, "समितिको ३५ नम्बर सिफारिस अनुसार यौनहिंसासँग जोडिएका  सबै प्रकारका अपराधको अनुसन्धान, पीडितलाई थप पिडा हुनबाट जोगाउने र महिलाविरुद्धका कुनै पनि किसिमको हिंसा हुन नदिनेमा सचेत हुनुपर्दछ ।"

उक्त विज्ञप्तिमा महरा प्रकरणबारे भने केही उल्लेख गरिएको छैन ।