बाटो पिच नभएपछि बौद्धमा शंख बजाएर सरकारको विरोध, प्रहरीद्वारा अश्रुग्यास प्रहार 

प्रधानमन्त्री भन्छन्–काठमाडौंमा धुलो कम भइसक्यो, मास्क लगाउने भेटिदैनन्, व्यापारी भन्छन्–धुलो कम गर्न ८० लाखको पानी सडकमै खन्यायौं, तर पनि भएन

बाटो पिच नभएपछि बौद्धमा शंख बजाएर सरकारको विरोध, प्रहरीद्वारा अश्रुग्यास प्रहार 

काठमाडौं । बौद्ध–जोरपाटीका स्थानीय नागरिकले बाटोको सास्ती बेहोर्न थालेको एक दशक हुन लाग्यो । अहिले कुम डुब्ने हिलो त कहिले धुलो । चार वर्षअघि चुच्चेपाटी–साँखु सडक विस्तार योजना सुरु भएपनि अहिलेसम्म पूरा नभएपछि स्थानीयले बुधबारदेखि आन्दोलन थाले ।

बिहीबार बिहान ८ बजेदेखि बाटो पिच हुनुपर्ने माग गर्दै बन्द गराए । बाटो बन्द गराएर आन्दोलनमा उत्रिएका स्थानीय र व्यवसायीले शंख बजाएर सरकारको विरोध गरेका छन् ।

सोही क्रममा प्रहरीले अरुग्यास प्रहार गरेको थियो । प्रहरीसँगको झडपमा केही स्थानीय घाइते भएका छन् । आन्दोलनका कारण चुच्चेपाटी–जोरपाटी सडकखण्ड ठप्प छ । सवारी साधन चलेका छैनन् । जनता मार्न पाइँदैन, धुवाँ–धुलो उडाउने सरकार चाहिँदैन, ठेकेदारलाई कारबाही गरलगायतका नारा लगाउँदै आन्दोलनमा उत्रिएका छन् ।

चाबहिलदेखि जोरपाटीसम्मका स्थानीयले उक्त सडकखण्डमा धुलो बढी हुँदा पनि सरकार र ठेकेदारले बेवास्ता गरेको भन्दै आज बिहानैबाट बाटो बन्द गराएका हुन् । सडक छेउका व्यवसायी पनि पसल बन्द गरेर सडकमा उत्रिएका छन् । उक्त सडकखण्ड वर्षौं बित्दासमेत पिच नभएको भन्दै स्थानीय आक्रोशित भएका छन् ।

प्रधानमन्त्री केपी शर्मा ओलीले सोमबार प्रतिनिधिसभाको बैठकमा काठमाडौंमा धुलो कम भएको, कोही पनि मास्क लगाएर हिँडनु नपरेको बताएका थिए । तर पनि स्थानीयले बाटोमा उडेको धुलो र धुवाँले नजिक बस्नै नसकिएको भन्दै विरोध जनाएका छन् । स्थानीय, व्यवसायीलगायतले ‘धुलो धुवाँ धेरै भो, स्वास फेर्न गाह्रो भो’, कालो पत्र छिटो गर’ ‘विश्व सम्पदाको संरक्षण गर’ लगायतका नारा लगाउँदै प्लेकार्ड बोकेर उक्त सडकखण्डमा प्रदर्शन गरेका छन् ।

बौद्ध व्यापार संघको पहलमा आज बिहानैबाट उक्त सडक बन्द गराएर स्थानीयले दबाब दिएका हुन् । “हामीले तीनवर्षदेखि संघर्षका कार्यक्रम गरेका थियौं,” बौद्ध व्यापार संघका सचिव सहदेव चौलागाईँले बाह्रखरीसँग कुरा गर्दे भने,“न त सरकारले सुन्छ, न ठेकेदारले ।” उक्त सडक खण्ड निर्माणको जिम्मा युनाइटेड विल्डर्सले पाएको थियो । उक्त कम्पनीको कार्यालयमा पुगेर समेत आफूहरुले दबाब दिएको भए पनि अहिलेसम्म सडक नबनेको भन्दै स्थानीय आक्रोशित भएका छन् । 

“हिजो बौद्ध गेटमा एकघण्टा चक्काजाम ग¥यौं,” उनले भने, “आज ८ बजेदेखि ५ बजेसम्म चक्काजाम गरेका छौं । परिणाम नआउन्जेल अब हामीले सडक खोल्दैनौं । सडक भत्काएको पाँचवर्ष बढी भइसक्यो तर अहिलेसम्म बनाइएको छैन ।” सडकको चौडाइ २२ मिटर बनाउने भनेर ठेक्का लगाइएपछि स्थानीले आफूहरुले घर नभत्काउन माग गर्दै सर्वोच्चमा रिट दायर गरेका थिए । सर्वोच्च अन्तरिम आदेश दिएपछि सडक निर्माणको काम रोकिएको थियो ।

अघिल्लो वर्ष नै मन्त्रिपरिषद् बैठकले अर्को व्यवस्था नभएसम्मका लागि जति सडक अहिले कायम छ त्यसमा पिच गर्नू भनेर निर्देशन दिएको भएपनि अहिलेसम्म नभएको चौलागाईँले जानकारी दिए । 

“हामीलाई धुवाँ धुलो त छँदैछ,” उनले भने, “बौद्ध व्यापार संघले तीन वर्षको बीचमा करिब ८० लाखको पानी बाटोमै खन्याइसक्यौं । अब त  त्यो पनि सम्भव भएन । धुलोले बस्नै नसकिने भयो । त्यसैले सडकमा उत्रियौं । हामीले नै पैसा उठाएर दिनमा तीनपटक ट्याङ्करबाट पानी सडकमा खन्याउने गरेका थियौं । तर पनि सरकारले वास्तै गरेन ।”
 

प्रतिकृया दिनुहोस
ad